پېښو ته د رسېدو په چارو کې د دولت وزارت مرستیال سیلاب ځپلو ته د رسېدنې د چارو د مدیریت لپاره لوګر ولایت ته ورسېد
لوګر- د زمري ۳۰مه-۱۴۰۱
محترم مولوی شرف الدین مسلم پېښو ته د رسېدو په چارو کې د دولت وزارت مرستیال، نن ماسپښین د لوګر ولایت خوشي ولسوالۍ کې د تېرې شپې سیلاب له امله زیانمن شویو ته د رسېدنې لپاره یاد ولایت ته سفر وکړ.
په دغه سفر کې پېښو ته د رسېدو په چارو کې د دولت وزارت مرستیال په خوشي ولسوالۍ کې له والي، د والي مرستیال او د سیلابونو ته د رسېدنې کمېټې غړیو سره غونډه ترسره کړه.
لومړۍ مولوي عنایت الله شجاع د لوګر ولایت والي د زیانمن شویو لپاره ترسره شویو اقداماتو په اړه معلومات وړاندې کړل چې زیانمن شویو ته ګرم خواړه او لومړنۍ مرستې رسېدلي دي.
ورته مهال مولوي انعام الله د لوګر د والي مرستیال ووېل چې د خوشي ولسوال په مشرۍ د زیانمن شویو بېړنیو اړتیاوو ته د رسېدنې لپاره د مختلفو دولتي ادارو په ګډون یوه کمېټه جوړه شوي ده.
وروسته ښاغلي مسلم د پېښو سره مبارزې ریاست ته لارښوونه وکړه چې د زیانمن شویو ټولو اړتیاوو پوره کولو لپاره دي له شته امکاناتو څخه ګټه واخلي.
نوموړي همدارنګه ووېل چې د دې ترڅنګ چې له مرکز څخه خیمې او نور توکي د انتقال په حالت کې دي، د اوچا دفتر او نورو موسسو سره خبرې ترسره شوي او هغوۍ هم د خپلو بشري مرستو د پېرېدو په حالت کې دي.
