له پېښو سره د مبارزې آمادګۍ ملي ادارې لوی رئیس د هیلو ټرسټ موسسې له رئیس او د ریاکټ موسسې د نړیوالو عملیاتو له مسؤل سره وکتل
نن سهار د دوشنبې په ورځ، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، د هیلو ټرسټ نړیوالې موسسې له رئیس محترم ډاکتر فرید همایون او د ریاکټ موسسې د نړیوالو عملیاتو له مسؤل پال تاولر سره چې د کونړ ولایت د نورګل ولسوالۍ غازي آباد پنډغالي پر لور تلونکي وو، وکتل.
محترم ترابي صاحب مېلمنو ته د ښه راغلاست ترڅنګ د ریاکټ موسسې مرستې په ځانګړي ډول د لټون او ژغورنې په وسایلو او تجهیزاتو کې مهمې وبللې. نوموړي ټینګار وکړ چې د بېړنیو حالاتو لپاره د اغېزناکې ځواب وینې په موخه د ادارې د داخلي وړتیاوو پیاوړي کول یوه جدي اړتیا ده. هغه زیاته کړه چې د بیړنیو حالاتو پر مهال د بهرنیو ټیمونو راتګ ستونزمن او لږ اغېزناک وي، نو غوره لاره داده چې د ادارې داخلي امکانات پیاوړي شي، او له موسسې یې وغوښتل چې په دې برخه کې همکاري وکړي.
ورته مهال، د ریاکټ موسسې د نړیوالو عملیاتو مسؤل، پال تاولر، له محترم ترابي صاحب څخه د لیدنې د فرصت برابرولو په پار مننه وکړه او ویې ویل چې زموږ موخه د دې ادارې سره د همکاریو د څرنګوالي ارزونه ده. هغه زیاته کړه چې د پېښو پر مهال همغږي او چمتووالی ځانګړی اهمیت لري او موږ لېوالتیا لرو چې د یو ګډ هوکړه لیک له لارې د دې ادارې سره همکاري ولرو، څو افغانان په بیړنیو حالاتو کې په خپله په لومړي سر کې اقدام وکړي. نوموړي ټینګار وکړ چې زموږ هڅه دا ده چې د موجوده امکاناتو او یا هم د نورو سرچینو له لارې د بېړنیو پېښو د ځواب وینې لپاره اړین تجهیزات برابر کړو.
همدارنګه، محترم ترابي صاحب د یادو موسسو مسؤلینو ته وویل چې کله تاسې پنډغالي ته ورسېږئ، نو په دوه ساعتونو کې به پخپله ووینئ چې د زلزله ځپلو لپاره د بېړنیو مرستو څومره اړتیا ده.
نېټه: ۱۴۴۷/۰۳/۲۲ هـ ق
له پېښو سره د مبارزې آمادګۍ ملي اداره
