له پېښو سره د مبارزې آمادګۍ ملي ادارې سرپرست د دې ادارې له ولایتي مسؤلینو سره د هغوی د ستونزو په اړه آنلاین غونډه وکړه
نن ورځ د شنبې په سهار، له پېښو سره د مبارزې آمادګۍ ملي ادارې سرپرست الحاج ملا نورالدین ترابي د ٣٤ ولایتونو له پېښو سره د مبارزې آمادګۍ ریاستونو له رئیسانو او مالي مدیرانو سره پر وخت د هغوی د ستونزو او ننګونو د حل لپاره د نوې ټکنالوژۍ په کارولو سره آنلاین غونډه ترسره کړه.
د دې آنلاین غونډې په پیل کې محترم ترابي صاحب وویل، چې د هېواد په جنوب کې یو شمېر ولایتونو ته زما د وروستي سفر په ترڅ کې څرګنده شوه، چې په ولایتي مستوفیتونو کې زموږ همکاران د مالي اسنادو د پړاوونو د بشپړولو په برخه کې له ستونزو سره مخ دي, نو د دې ننګونو او نورو ستونزو د حل په موخه مو دا غونډه ترسره کړه.
ورپسې د دې ادارې ولايتي مسؤلينو په وار سره د مالي اسنادو په برخه کې د خپلو ستونزو، د کارکوونکو د سفریو د نه حواله کېدو، د ترانسپورټي وسایلو د ترميم، د کارکوونکو لپاره د کاري وسايلو او نورو مهمو مسايلو په اړه خبرې وکړې او د يادې ادارې له محترم مقام څخه يې د دې ستونزو د حل غوښتنه وکړه او په مقابل کې یې د ولایتونو په کچه د رامنځته شویو نیمګړتیاوو د لرې کولو په اړه ژمنه وکړه.
له پېښو سره د مبارزې آمادګۍ ملي ادارې سرپرست, د ولایتي مسؤلینو ټولو ستونزو په غور سره د اورېدو سره هم مهاله د ځینو موضوعاتو او ستونزو د حل لپاره مسؤلینو ته لارښوونې وکړې او د ځینو ستونزو په اړه یې هغوی ته ډاډ ورکړ چې ژر تر ژره به حل شي.
په پای کې د ادارې سرپرست ووېل, چې د دې ادارې کارکوونکي باید د پېښې د رامنځته کېدو په صورت کې ژر تر ژره زیانمنو شویو ته رسېدنه وکړي او د مالیې محترم وزارت او د اسلامي امارت د ریاست الوزراء محترم مقام له لارې به د ولایتونو په کچه د هغوی په کارونو کې په ځانګړې توګه د مستوفیتونه په برخه کې د شته ستونزو د حل لپاره خپلې هڅې وکړي.
نېټه: ۱۴۴۶/۱۰/۱۴ هــ ق
له پېښو سره د مبارزې آمادګۍ ملي اداره
