له پېښو سره د مبارزې آمادګۍ ملي ادارې او د FSCWEO مؤسسې ترمنځ ټولټال د څلور سوه او یو نوي زره او شپږ سوه اووه ویشت (۴۹۱,۶۲۷) ډالرو په ارزښت د ګډو همکاریو تفاهم نامه لاسلیک شوه

نن ورځ سې شنبه له غرمې مخکې، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي د FSCWEO مؤسسې د اړیکو له مسؤل محترم مزمل دراني سر په خپل کاري دفتر کې وکتل او د ګډو همکاریو تفاهم نامه یې ورسره لاسلیک کړه. 

په پیل کې، ترابي صاحب د یادې موسسې پلاوي ته ښه راغلاست وویل، او له یاد پلاوي څخه یې وغوښتل چې خپله پروژه پر وخت او په پوره شفافیت سره ترسره کړي، ترڅو مستحقې کورنۍ پر وخت ګټه ترې واخلي. 

ورپسې، محترم دراني له ترابي صاحب څخه د لیدنې زمینې برابرولو په پار مننه وکړه او د خپلې راتلونکې پروژې په اړه یې بشپړ معلومات وړاندې کړل. 

په پای کې، د دواړو لوریو ترمنځ ټولټال د څلور سوه او یو نوي زره او شپږ سوه اووه ویشت (۴۹۱,۶۲۷) ډالرو په ارزښت د ګډو همکاریو تفاهم نامه لاسلیک شوه، چې له مخې به یې د هرات ولایت په ادرسکن، رباط سنګي او کشک کهنه ولسوالیو کې ۱,۴۷۰ مستحقو کورنیو ته د څلورو میاشتو لپاره هره میاشت هرې کورنۍ ته ۵۰ کیلو اوړه، ۴ لیټره غوړي، ۴ کیلو حبوبات او نیم کیلو مالګه ووېشل شي او همدارنګه د یادې تفاهم نامې له مخې به ۲,۸۰۰ کورنیو ته د یو ځل لپاره د رومیانو، بامیه، پیاز، پالک او بانجانو اصلاح شوي تخمونه او د باغدارۍ د وسایلو یو کیټ ووېشل شي. 

نېټه: ۱۴۴۷/۷/۱۶ هـ ق

له پېښو سره د مبارزې آمادګۍ ملي اداره