له پېښو سره د مبارزې آمادګۍ ملي ادارې او د ژغورنې نړیوالې کمیټې (IRC) ترمنځ د ۱,۰۱۹,۰۳۴ ډالرو په ارزښت د ګډو همکاریو تفاهم نامه لاسلیک شوه

نن د چهارشنبې په ورځ له غرمې وروسته، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، د ژغورنې نړیوالې کمیټې (IRC) له رئیسې، مېرمن شیرین حسن ابراهیم او د هغې له مل پلاوي سره په خپل کاري دفتر کې وکتل او د ګډو همکاریو تفاهم‌نامه یې ورسره لاسلیک کړه.
په دې ناسته کې، ترابي صاحب د یادې کمیټې پلاوي ته ښه راغلاست وویل او څرګنده یې کړه چې موږ مؤسسو ته واک ورکړی دی چې په هره برخه او هر ولایت کې چې کولای شي، خلکو ته مرستې ورسوي او بنسټیزې پروژې پلي کړي. هغه زیاته کړه چې افغانستان د اقلیمي بدلونونو په ګډون له ګڼو ستونزو اغېزمن شوی او مرستو ته اړتیا لري، نو ځکه موږ له موسسو سره چټکه او شفافه همکاري کوو.
ورته مهال، مېرمن شیرین د دې ترڅنګ چې د خپلې روانې پروژې په اړه یې معلومات وړاندې کړل، د ترابي صاحب او د دې ادارې د کارکوونکو له تېرو همکاریو څخه یې هم مننه وکړه. هغې وویل، یو له هغو دلایلو چې موږ کولای شو خپلې پروژې په چټکۍ سره پلي کړو او له ډونرانو څخه زیاته بودجه ترلاسه کړو، له پېښو سره د مبارزې آمادګۍ ملي ادارې اغېزمنه او پر وخت همکاري ده چې موږ ته د دغو کارونو زمینه برابروي.
په پای کې، دواړو لوریو د ۱,۰۱۹,۰۳۴ ډالرو په ارزښت د ګډو همکاریو تفاهم‌نامه لاسلیک کړه. د دې تفاهم‌نامې له مخې به، ۲۰۸۰ اړمنو او زیانمنونکو کورنیو ته د بادغیس ولایت په مقر ولسوالۍ کې نغدي مرستې ووېشل شي، په دې توګه چې هرې کورنۍ ته به د ۳۰۰ ډالرو مرسته د اړتیا او زیان‌مننې کچې ته په کتو په بېلابېلو قسطونو کې ووېشل شي.
همداراز، د هرات او بادغیس ولایتونو له خطر سره مخ د سیمو تخنیکي سروې هم د دې پروژې برخه ده، تر څو د دې کمېټې او نورو اړوندو ادارو لخوا د راتلونکو پروژو لپاره ترې ګټه واخیستل شي.

نېټه: ۱۴۴۶/۱۱/۱۶ هـ ق
له پېښو سره د مبارزې آمادګۍ ملي اداره