له پېښو سره د مبارزې آمادګۍ ملي ادارې او د افغاناېډ موسسې ترمنځ د ۶۸۵,۲۳۷ ډالرو په ارزښت د ګډو همکاریو تفاهمنامه لاسلیک شوه
نن د پنجشنبې په ورځ له غرمې مخکې، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، د افغاناېډ موسسې د پروګرامونو له رئیس، محترم عبدالرحمن طارق سره په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
په دې ناسته کې، ترابي صاحب د یادې موسسې پلاوي ته ښه راغلاست وویل او د دې موسسې د اوسنۍ پروژې په اړه یې خبرې وکړې، نوموړي دا پروژه د غور ولایت د خلکو لپاره یو لوی خدمت وباله. همداراز هغه څرګنده کړه چې موږ پر خپلې ادارې بشپړه واکمني لرو او ټولو موسسو ته ډاډ ورکوو چې د هغوی د پروژو د پلي کېدو په برخه کې به لازمه همکاري ورسره وشي.
ورته مهال، د افغاناېډ موسسې د پروګرامونو رئیس، محترم عبدالرحمن طارق، د خپلې پروژې په اړه معلومات وړاندې کړل او له پېښو سره د مبارزې آمادګۍ ملي ادارې د چارو په ترسره کولو کې د چټکتیا له شتون او د بیوروکراسۍ د نشتوالي څخه ستاینه وکړه او له ترابي صاحب څخه یې په دې برخه کې ځانګړې مننه وکړه.
د یادونې وړ ده، چې د دې ناستې په پای کې یوه تفاهمنامه ټولټال د ۶۷۵,۲۳۷ ډالرو په ارزښت د دواړو ادارو ترمنځ لاسلیک شوه. د دې تفاهمنامې له مخې، ټاکل شوې ده چې د غور ولایت په فیروزکوه کې به ۱۵۵ زیانمنو کورنیو ته د کور جوړولو لپاره، هرې کورنۍ ته ۲۰۰۳.۳۴ ډالر او د شخصي خونديتوب یوه بسته د ۸.۵۰ ډالرو په ارزښت، ۱۸۷ زیانمنو کورنیو ته د کور اساسي ترمیم لپاره، هرې کورنۍ ته ۵۵۰ ډالر او ۲۴۱ کورنیو ته د کور جزئي ترمیم لپاره، هرې کورنۍ ته ۳۳۰ ډالر ووېشل شي. همدارنګه، له دې جملې څخه هغو ۱۷۷ کورنیو ته چې د کورنۍ سرپرست یې معلولین یا ښځې وي، ۶.۵۰ ډالر د هڅونې په ډول ورکول کېږي.
د یادونې وړ ده، چې د دې پروګرام د ګټې اخیستونکو لپاره به د کور جوړولو د تخنیکي لارښوونو اړوند روزنیز پروګرامونه هم ترسره شي.
نېټه: ۱۴۴۶/۱۲/۱ هـ ق
له پېښو سره د مبارزې آمادګۍ ملي اداره
