د ننګرهار ولایت له پيښو سره د مبارزې آمادګۍ ریاست ۵۸۴ سېلاب ځپلو کورنیو ته خوراکي او غیرخوراکي مرستې ووېشلې
د ننګرهار ولایت له پېښو سره د مبارزې آمادګۍ ریاست د DACAAR، له ماشومانو څخه د ملاتړ، د VDO موسسو او د کډوالۍ نړیوال سازمان (IOM) په ملاتړ، د دې ولایت د جلال اباد ښار په ۱ او ۴ ناحیه او همدارنګه په پچیراګام او کوزکونړ ولسوالیو کې ۵۸۴ سېلاب ځپلو کورنیو ته له سروې وروسته خوراکي او غیرخوراکي مرستې ووېشلې.
په دې لړۍ کې د مسؤلینو په شتون کې، د DACAAR مؤسسې له لوري له یاد شمېر کورنیو څخه ۲۲۶ کورنیو هرې یوې ته د ۲۰ قلمه غیرخوراکي توکو لرونکی ۱ کېټ، د IOM سازمان له لوري ۲۶۴ کورنیو هرې یوې ته ۱ عدد سولري څراغ، ۱ د پخلنځي کېټ، ۳ تختې کمپلې، ۱۱۲ کورنیو ته چې کورونه یې په نسبي ډول ویجاړ شوي وو، هرې کورنۍ ته د یادو توکو سربېره د بیا رغونې ۱ کیټ، همدارنګه ۵۲ کورنیو ته چې کورونه یې په بشپړ ډول ویجاړ شوي وو هرې کورنۍ ته د یادو توکو سربېره ۱ باب خېمه، د ماشومانو د ملاتړ مؤسسې له لوري ۲۶۴ کورنیو هرې یوې ته د روغتیا ساتنې ۱ کېټ او د VDO موسسې له لوري د خوړو نړیوال پروګرام (WFP) په مالي ملاتړ، ۹۴ کورنیو هرې یوې ته ۱۰۰ کیلو اوړه، ۹.۱ کیلو غوړي، ۱۲.۵ کیلو دال او ۱ کیلو مالګه ووېشل شوه.
د یادونې وړ ده، چې د مرستو ترلاسه کوونکو کورنیو د مرستو د ترلاسه کولو په پار له یادو مؤسسو او د دې ولایت له پېښو سره د مبارزې آمادګۍ ریاست له مسؤلینو څخه مننه وکړه او خوښي یې څرګنده کړه.
نېټه:۱۴۴۷/۱۱/۴ هـ ق
له پېښو سره د مبارزې آمادګۍ ملي اداره
