په فراه ولایت کې ناچاوده توکي کشف او خنثی شول
د فراه ولایت له پېښو سره د مبارزې آمادګۍ ریاست د همغږۍ پر بنسټ د DRC ماین پاکۍ نړیوالې موسسې تخنیکي ټیم د یاد ولایت مرکز فراه په ګینهکان او اسحاق زی کلیو کې د ماین پاکۍ عملیاتو په ترڅ کې یو فیر د هاوان مرمۍ او دوه فیره د توپ مرمۍ کشف او په خوندي ډول خنثی کړې.
دا ناچاوده توکي د تېرو جګړو پاتې شوني وو او د سیمې د اوسېدونکو لپاره خطر پېښ کړی و، له پېښو سره د مبارزې آمادګۍ ریاست مسؤلینو له خلکو وغوښتل چې د هر ډول ناچاوده توکو د لیدو په صورت کې له اړونده مسؤلینو سره اړیکه ونیسي څو د تلفاتو او خساراتو د مخنیوي لپاره اړین اقدامات ترسره شي.
د یادونې وړ ده، چې د خلکو د ځان او مال د خوندیتوب لپاره د ولایت په کچه د ماینونو او ناچاوده توکو د موندلو او له منځه وړلو بهیر دوام لري
نېټه:۱۴۴۷/۶/۲۰ هـ ق
له پېښو سره د مبارزې آمادګۍ ملي اداره
