له پېښو سره د مبارزې آمادګۍ ملي ادارې او د RRDPO موسسې ترمنځ د ګډو همکاریو تفاهم نامه لاسلیک شوه
نن سهار سهشنبه، له پېښو سره د مبارزې آمادګۍ ملي ادارې سرپرست الحاج ملا نورالدین ترابی، د RRDPO مؤسسې د پروژې له مسؤل محترم رحیمالله عابد سره په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
ترابی صاحب په دې ليدنه کې د ښه راغلاست ترڅنګ ټینګار وکړ، چې له پېښو سره د مبارزې آمادګۍ ملي اداره تل د مرستندویه موسسو سره د هغوی د فعالیتونو په ترسره کولو کې همکاري کوي، ځکه چې د دوی فعالیتونه د هېواد خلکو ته ګټه رسوي.
وروسته، د RRDPO موسسې د پروژې مسؤل رحیمالله عابد د یادې پروژې په اړه معلومات وړاندې کړل او ویې ویل چې دا پروګرام د خوړو نړیوال سازمان په مالي ملاتړ پلي کېږي او د دې پروژې په چوکاټ کې، د RRDPO مؤسسه د تخنیکي، اداري او سروی چارو مسولیت لري او په اضطراري حالاتو کې به د ۳۰,۵۱۳ ډالرو په ارزښت دا پروګرام پلي کړي.
د دی تفاهمنامې پر بنسټ، د خوړو نړیوال سازمان په مالي ملاتړ د بېړنیو حالاتو پر مهال ۲۴۵۰ کورنیو ته به په ننگرهار ولایت کې د ۱۰۰ کیلوګرامه اوړه، ۱۲.۵ کیلوګرامه نخود، ۹.۱ کیلوګرامه غوړي او ۱ کیلوګرامه مالګې د مرستو بستې د RRDPO موسسې په همغږۍ ووېشل شي.
نېټه:۱۴۴۶/۹/۴
له پېښو سره د مبارزې آمادګۍ ملي اداره
