د لغمان ولایت له پېښو سره د مبارزې آمادګۍ ریاست په علینګار او دولت شاه ولسوالیو کې د پېښو د خطرونو کمولو د عامه پوهاوي پروګرامونه ترسره کړل او د بېړنۍ ځواب وینې تجهیزات یې جوړو شوو کمېټو ته وسپارل
د لغمان ولایت له پېښو سره د مبارزې آمادګۍ ریاست د کډوالۍ نړیوال سازمان (IOM) په مالي همکارۍ، د علینګار او دولت شاه ولسوالیو په یو شمېر کلیو کې د ټولنې پر بنسټ د پېښو د خطر د کمولو او مدیریت (CBDRM) په موخه لس ورځني روزنیز پروګرامونه او د عامه پوهاوي کمپاینونه په بریالیتوب سره بشپړ کړل او ورسره یې د بېړنۍ ځواب وینې اړوند تجهیزات هم جوړو شویو کمېټو ته وسپارل.
په دغو پروګرامونه کې د هر کلي ۳۰ تنه نارینه او ۳۰ تنه ښځینه اوسېدونکو ګډون کړی و او د قدرتي پېښو د خطرونو د کمولو، د خطرونو د ارزونې، چمتووالي، د لومړنۍ ځواب وینې او د لټون او ژغورنې اړوند اړینې نظري او عملي زده کړې یې ترلاسه کړې.
د روزنیزو پروګرامونو په ترڅ کې په هر کلي کې د روغتیا، ژغورنې، لټون او خبرداري کمیټې هم جوړې شوې، ترڅو د قدرتي پېښو پر مهال د خپلو ټاکل شوو مسؤلیتونو له مخې په منظم، همغږي او اغېزمن ډول فعالیت وکړي او د احتمالي زیانونو په کمولو کې مهم رول ولوبوي.
همدارنګه، د هر کلي لپاره یو کانټینر، چې د ژغورنې او بېړنۍ ځواب وینې اړوند ۴۹ قلمه بېلابېل تجهیزات پکې ځای پر ځای شوي وو، د اړوندو کلیو کمېټو ته وسپارل شول. ټاکل شوې ده چې دغه تجهیزات به د سېلابونو، د ځمکې ښوېیدنې او نورو قدرتي پېښو پر مهال د ژغورنې، لومړنیو روغتیايي مرستو او بېړنۍ ځواب په برخه کې د سیمهییزو خلکو له خوا وکارول شي، د دې ترڅنګ د پروګرام په پای کې د جوړو شوو کمیټو له لوري د بېړنیو حالاتو لپاره د چمتووالي او د بېړني ضعیت د مدیریت یو عملي تمرین هم ترسره شو.
د لغمان ولایت له پېښو سره د مبارزې آمادګۍ ریاست ټینګار وکړ چې د امارتي ادارو، همکارو بنسټونو او سیمهییزو خلکو په همغږۍ به د قدرتي پېښو د خطرونو د کمولو، د ټولنو د مقاومت د پیاوړتیا او د خلکو د ژوند او شتمنیو د خوندي کولو لپاره خپلو هڅو او وقایوي پروګرامونو ته دوام ورکړي.
