د بامیان ولایت له پېښو سره د مبارزې آمادګۍ ریاست په مرکز کې د اوبو کانال د پاکولو پروژه بشپړه او ګټې اخیستنې ته وسپارله
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي، د لارښوونې پر بنسټ، د بامیان ولایت له پېښو سره د مبارزې آمادګۍ ریاست د یاد ولایت د مرکز اړوند د سیدآباد او حیدرآباد کلیو د اوبو کانال د پاکولو پروژه بشپړه کړه او د سیمې خلکو ته یې د ګټې اخیستنې لپاره وسپارله.
د یادې پروژې په ترڅ کې شاوخوا د ۵ کیلومتره په اوږدوالي د اوبو کانال پاک شو، چې د وروستیو سېلابونو له امله له خټو، شګو او رسوباتو څخه ډک شوی و، چې د اوبو اصلي جریان یې ستونزمن کړی او د سیمې اوسېدونکو ته یې ګڼې ستونزې رامنځته کړې وې. د پروژې له بشپړېدو وروسته د اوبو جریان بېرته عادي شوی او د کرنیزو ځمکو د خړوبولو او د خلکو د اړتیاوو د پوره کولو لپاره مناسب شرایط برابر شوي دي.
دا پروژه د «د غنمو په بدل کې د کار» پروګرام په چوکاټ کې پلې شوه، چې په ترڅ کې یې ۵۰ کارګرو دغه کانال پاک کړ او د کار په بدل کې هر کارګر ته دوه بورۍ غنم ووېشل شول.
د بامیان ولایت له پېښو سره د مبارزې آمادګۍ ریاست مسؤلینو د پروژې له ساحې څخه لیدنه وکړه، د کار کیفیت یې د ډاډ وړ وباله او ټینګار یې وکړ چې یاد ریاست به د خلکو د ستونزو د حل او د قدرتي پېښو د خطرونو د کمولو په موخه د ورته وقایوي او انکشافي پروژو پلي کولو ته دوام ورکړي.
