د هرات ولایت له پېښو سره د مبارزې آمادګۍ ریاست په کشک رباط سنګي ولسوالۍ کې د استنادي دیوالونو جوړولو څلور وقایوي پروژې بشپړې او ګټې اخیستنې ته وسپارلې
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي لخوا د کډوالۍ نړیوال سازمان (IOM) له دفتر سره د هغږۍ پر بنسټ، د هرات ولایت له پېښو سره د مبارزې آمادګۍ ریاست د یاد سازمان په همکارۍ د قدرتي پېښو له امله د رامنځته کېدونکو خطرونو د کمولو او د خلکو د ځان او مال د خوندیتوب په موخه، د کشک رباط سنګي ولسوالۍ په څلورو بېلابېلو سیمو کې د استنادي دیوالونو د جوړولو پروژې بشپړې کړې او رسمآ یې ګټې اخیستنې ته وسپارلې.
دغه پروژې د دیارلس میلیونه او اووه لکه او پنځوس زره (۱۳٫۷۵۰٫۰۰۰) افغانیو په ټولیز لګښت پلې شوې، چې په ترڅ کې یې د خواجه ګلبید په سیمه کې، د ۱۳۰ متره په اوږدوالي او ۴ متره لوړوالي یو استنادي دیوال، د دوآب سفلي په سیمه کې، د ۳۲۷ متره په اوږدوالي او ۳.۵ متره لوړوالي یو استنادي دیوال، د خلاوک سفلي په سیمه کې د ۱۴۵ متره په اوږدوالي او ۴.۸ متره لوړوالي یو استنادي دیوال او د خلاوک نورزایي په سیمه کې د ۳۶۵ متره په اوږدوالي او ۳.۸ متره لوړوالي یو استنادي دیوال جوړ شوی دی. د دغو استنادي دیوالونو جوړېدل به د سېلابونو د خطرونو په کمولو، د کرنیزو ځمکو د محصولاتو د ویجاړېدو په مخنیوي، د عامه تأسیساتو په ساتنه او د سیمې د اوسېدونکو لپاره د خوندیتوب په رامنځته کېدو مهم رول ولوبوي.
د هرات ولایت له پېښو سره د مبارزې آمادګۍ ریاست د یادو پروژو د پلي کولو له پیل څخه تر بشپړېدو پورې د پروژې د کار بهیر له نږدې څارلی او د پروژې کیفیت یې د ډاډ وړ بللی دی.
د هرات ولایت له پېښو سره د مبارزې آمادګۍ ریاست ټینګار وکړ، چې په راتلونکې کې به هم د ملي او نړیوالو همکارو ادارو په همغږۍ د ولایت په نورو زیانمنونکو سیمو کې ورته وقایوي پروژې پلې کړي، ترڅو د قدرتي پېښو خطرونه راکم او د خلکو د ځان او مال ساتنه لا پیاوړې شي.
