د سمنګان ولایت له پېښو سره د مبارزې آمادګۍ ریاست په ایبک ښار کې د سړک د بیارغونې پروژه بشپړه او ګټې اخیستنې ته وسپارله
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي د لارښوونې پر بنسټ، د سمنګان ولایت له پېښو سره د مبارزې آمادګۍ ریاست، د دې ولایت د مرکز ایبک ښار اړوند د صوفیان کلي د دره زندان سړک د بیارغونې پروژې کار بشپړ کړ او ګټې اخیستنې ته یې وسپاره.
یاد سړک د وروستیو سېلابونو له امله زیانمن شوی و، چې له امله یې د سیمې د اوسېدونکو د تګ راتګ پر وړاندې ستونزې رامنځته شوې وې. د بیارغونې د چارو له بشپړېدو وروسته، دغه سړک بېرته د ګټې اخیستنې وړ وګرځېد او د خلکو پر مخ پرانیستل شو.
په دې پروژه کې د ۲ کیلومتره په اوږدوالي او ۸ متره پلنوالي د سړک د بیارغونې کار د خوندي تګ راتګ د برابرولو، د مواصلاتي لارو د ښه والي اود سیمې د اوسېدونکو د ستونزو د حل په موخه ترسره شوی دی.
د سمنګان ولایت له پېښو سره د مبارزې آمادګۍ ریاست مسؤلینو ټینګار وکړ چې یاد ریاست به تل د خلکو د خدمت، د زیانمنو شویو کسانو د ستونزو د حل او د عامه ګټو د پروژو د پلي کولو په برخه کې خپلو هڅو ته دوام ورکړي.
د سیمې اوسېدونکو هم د دې پروژې له بشپړېدو څخه خوښي څرګنده کړه او د خلکو د ستونزو د حل په موخه یې د سمنګان ولایت له پېښو سره د مبارزې آمادګۍ ریاست له پاملرنې څخه مننه وکړه.
