د جوزجان ولایت له پېښو سره د مبارزې آمادګۍ ریاست د اوبو د کاروونکو د کمېټو د روزنیز پروګرام او کاري تجهیزاتو د وېش له بهیر څخه څارنه وکړه
د جوزجان ولایت له پېښو سره د مبارزې آمادګۍ ریاست، د ماشومانو د ملاتړ نړیوالې مؤسسې (Save the Children) له لوري د اوبو د سرچینو د مدیریت د ښه والي او د وچکالۍ د اغېزو د کمولو پروژې په چوکاټ کې، د روزنیز پروګرام او کاري تجهیزاتو د وېش له بهیر څخه څارنه ترسره کړه.
دغه څلور ورځنی روزنیز پروګرام د اوبو د کاروونکو د کمېټو د غړو د ظرفیت لوړولو په موخه، د اوبو د سرچینو د ترمیم، ساتنې او پالنې په برخو کې د جلالآباد، نکرآباد، چهارشنبې، ینګي اریغ او چوباش کلان کلیو کې ترسره شو، چې د اوو کمېټو غړو په کې نظري او عملي زده کړې ترلاسه کړې.
د پروګرام په پای کې، د شپږو کلیو د اوبو د کاروونکو اتو کمېټو ته، ټولټال ۵۶ قلمه کاري تجهیزات، چې برقي وسایل، د نللیکې او ساختماني چارو اړوند وسایل په کې شامل وو، ووېشل شول، څو د اوبو د تاسیساتو د ترمیم او ساتنې په چارو کې ترې ګټه واخیستل شي.
د روزنیز پروګرام د ترسره کېدو او د تجهیزاتو د وېش بهیر د جوزجان ولایت له پېښو سره د مبارزې آمادګۍ ریاست له لوري هر اړخیز وڅارل شو. ارزونو وښودله چې تجهیزات د پروژې له پلان سره سم او په بشپړه روڼتیا مستحقینو ته وېشل شوي او روزنیز پروګرام هم په منظم او اغېزمن ډول ترسره شوی دی.
دغه پروګرام د سیمهییزو ټولنو د ظرفیت لوړولو، د اوبو د سرچینو د مدیریت د ښه والي او د وچکالۍ د اغېزو پر وړاندې د چمتووالي د زیاتوالي په برخه کې یو مهم ګام بلل کېږي.
