د کابل ولایت له پېښو سره د مبارزې آمادګۍ ریاست په خاکجبار ولسوالۍ کې د پېښو د خطرونو کمولو د پروژو پلي کولو لپاره د پېښو له خطر سره د مخ سیمو سروې وکړه
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي د لارښوونې پر بنسټ، د کابل ولایت له پېښو سره د مبارزې آمادګۍ ریاست یو پلاوی، چې د کابل ولایت مقام استازی، د کلیو د بیارغونې او پراختیا ریاست استازی پکې شامل وو او د خاکجبار ولسوالۍ د ولسوال په همغږۍ د یادې ولسوالۍ په بېلابېلو سیمو کې د پېښو د خطر د کمولو پروژو د پلي کولو په موخه تخنیکي سروې وکړه.
دغه سروې د خاکجبار ولسوالۍ په بېلابېلو کلیو کې د استنادي او ګبیوني دېوالونو جوړولو، د کاریزونو پاکولو، د خاورینو چکډېمونو جوړولو او نورو عامه ګټو پروژو د پلي کولو په موخه د مناسبو سیمو پېژندنې او ارزونې لپاره ترسره شوه.
د کابل ولایت له پېښو سره د مبارزې آمادګۍ رئیس، محترم مولوي نجیبالله انوري د دې پروګرام په ترڅ کې د سیمې اوسېدونکو ته ډاډ ورکړ چې د کاریزونو د پاکولو او د کوچنیو خاورینو چکډېمونو د جوړولو لپاره به د دغه ریاست له لوري د «خوراکي توکو په بدل کې کار» پروګرام پلي شي. نوموړي زیاته کړه چې دا اقدام به نه یوازې خلکو ته د کار زمینه برابره کړي، بلکې د ګټورو او بنسټیزو پروژو د پلي کېدو فرصت به هم رامنځته کړي، چې ګټې به یې د سیمې ټولو اوسېدونکو ته ورسېږي.
د خاکجبار ولسوالۍ اوسېدونکو هم د سروې پلاوي له شتون او له پېښو سره د مبارزې آمادګۍ ادارې له لوري د دې ولسوالۍ اړتیاوو ته د پاملرنې هرکلی وکړ او ژمنه یې وکړه چې د دغو پروژو په ښه توګه پلي کولو کې به هر اړخیزه همکاري وکړي.
نېټه: ۱۴۴۷/۱۲/۲۴ هـ ق
له پېښو سره د مبارزې آمادګۍ اداره
