د کابل ولایت په ده سبز او فرزه ولسوالیو کې د اوبو رسونې شبکو د جوړولو او ترمیم کار بشپړ او ګټې اخیستنې ته وسپارل شوې
له پېښو سره د مبارزې آمادګۍ ادارې د لوی رئیس او د کډوالۍ نړیوال سازمان (IOM) ترمنځ د همغږۍ له مخې، د یاد سازمان په مالي ملاتړ او د کابل ولایت له پېښو سره د مبارزې آمادګۍ ریاست په همکارۍ، د دې ولایت په ده سبز او فرزه ولسوالیو کې د اوبو رسونې شبکو د جوړولو او ترمیم کار بشپړ او رسمآ خلکو ته د ګټې اخیستنې لپاره وسپارل شوې.
د ده سبز ولسوالۍ د ترکو کلي د خلکو لپاره چې د څښاک اوبو ته په لاسرسي کې له سختو ستونزو سره مخ وو، د اوبو رسونې په دې پروژه کې، د ۹ متر مکعب اوبو یوه کانکرېټي ذخیره، له فرېم سره د ۶ تختې سولر نصبول، له ۱۳۰ متره پایپ سره د ۲ کیلو واټ آببازک نصبولو سره د اوبو رسونې یوه شبکه جوړه شوه او د څښاک اوبو ته د لاسرسي په برخه کې د ۵۰ کورنیو ستونزه په بشپړه توګه حل شوه.
همداراز، د فرزه ولسوالۍ په قلعه کریم کلي کې د ابو رسونې شبکه چې د تېرو طبیعي پېښو له امله زیانمنه شوې وه، د ترمیم کار یې بشپړ شو، چې په پایله کې یې د څښاک اوبو ته د لاسرسي په برخه کې د یاد کلي د ۴۰ کورنیو ستونزه حل شوه.
د یادو ولسوالیو خلکو د کابل ولایت له پېښو سره د مبارزې آمادګۍ ریاست او د IOM سازمان له لوري د دې پروژې د کار بشپړولو په پار مننه او قدرداني وکړه.
نېټه: ۱۴۴۷/۱۱/۲۶ هـ ق
له پېښو سره د مبارزې آمادګۍ اداره
