په فراه ولایت کې ناچاوده توکي کشف او له منځه یوړل شول
د فراه ولایت له پېښو سره د مبارزې آمادګۍ ریاست، د (DRC) دفتر د ماین پاکۍ برخې په تخنیکي همکارۍ، د یاد ولایت د پشت رود ولسوالۍ په مساو کلي کې د تېرو جګړو څخه پاتې چاودېدونکي توکي کشف او په خوندي ډول له منځه یوړل.
په دې چاودېدونکو توکو کې یوه ۸۲ ملي متري د هاوان مرمۍ او اووه د BM1 ډول ۱۰۷ مليمتري مرمۍ شتون درلود.
د یاد ریاست مسؤلینو ټینګار کړی چې دا ډول چاودېدونکي توکي د ملکي وګړو، په ځانګړي ډول د ماشومانو لپاره جدي ګواښ ګڼل کېږي. له همدې امله یې له ځایي اوسېدونکو غوښتنه کړې چې که کوم مشکوک شی وویني، له نږدې کېدو څخه دې ډډه وکړي او ژر تر ژره دې له اړوندو مسؤلینو سره اړیکه ونیسي.
نېټه: ۱۴۴۷/۱۱/۰۱ هـ ق
له پېښو سره د مبارزې آمادګۍ ملي اداره
