له پېښو سره د مبارزې آمادګۍ ملي ادارې لوی رئیس د سویس د پراختیا او همکارۍ ادارې له رئیس سره وکتل
نن ورځ د چهارشنبې په سهار، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، په خپل کاري دفتر کې د سویس هېواد د پراختیا او همکارۍ ادارې له رئیس اریک مارکلی، د هغه له مرستیالې آغلې پامیله استتاکیس او مل پلاوي سره وکتل او د دوه اړخیزو همکاریو د پراختیا په اړه یې خبرې وکړې.
محترم ترابي صاحب د ادارې د فعالیتونو د تشریح پر مهال وویل چې دا اداره پر پنځو اساسي موخو؛ وقایې، د خطر کمول، چمتووالي، ځواب وینې او بیارغونې کار کوي او اوس مهال د بشري مرستو د وېش تر څنګ، وقایوي پروژو لکه د خوړونو پاکولو او د ګبیوني او استنادي دېوالونو پر جوړولو تمرکز لري.
هغه همدارنګه وویل چې د اقلیمي بدلونونو له امله د افغانستان د اغېزمن کېدو په پام کې نیولو سره، تمویل کوونکي باید له سیاسي ملاحظاتو پرته له هېواد سره په دې برخه کې همکاري وکړي او په دې برخه کې د دې ترڅنګ چې د مرستندویه بنسټونو او مؤسسو لپاره مو لازمې اسانتیاوې برابرې کړې دي او د پېښو د مدیریت په برخه کې مو د خپلو لومړیتوبونو لړلیک هم ترتیب کړی دی، تر څو د هغوی لپاره د مرستو، د پروژو د پلي کولو او د تمویل کوونکو له لوري د بودجې د ترلاسه کولو لاره روښانه شي.
په همدې حال کې د سویس د پراختیا او همکارۍ ادارې رئیس د خپلې ادارې د فعالیتونو د تشریح ترڅنګ وویل چې اوس مهال زموږ په فعالیتونو کې درې برخې لکه، د بشر حقوق، د اقلیم بدلونونه او بشري مرستې او همدارنګه د خصوصي سکتور د ملاتړ له لارې د اقتصادي بیاځواکمنتیا شاملې دي. نوموړي وویل چې یاده اداره له څونو کلونو راهیسې فعالیت کوي، خو له یو کال راهیسې یې د افغانستان له تخنیکي ادارو سره د نږدې همکارۍ په موخه بېرته حضوري فعالیتونه پیل کړي دي او ګډ کار او له سکتوري ادارو څخه مشورې ترلاسه کول د پروژو د بریا او اغېزمنتیا مهم لامل ګڼي.
نوموړي همدارنګه وویل چې هڅه کوي چی د تخنیکي ادارو سره د نږدې همکارۍ له لارې له تمویل کوونکو څخه زیاته بودجه ترلاسه کړي او پروژې به د داخلي مؤسسو له لارې پلي کوی.
همدارنګه د یادې ادارې مرستیالې، آغلې پامیله ستتاکیس او د اقلیمي بدلونونو او د پېښو د برخې مسؤل، محمد مصطفی صاحبزاده د خپلو روانو پروژو په اړه معلومات وړاندې کړل او ویې ویل چې د ماین پاکۍ په برخه کې یوه پروژه په پام کې لري او څلور نورې پروژې هم د مؤسسو له لوري د پلي کېدو په حال کې دي چې هره یوه یې د پېښو د مدیریت له یوې برخې سره تړاو لري.
په پای کې دواړو لوریو د تخنیکي برخو له لارې د همکاریو د کچې پر زیاتولو ټینګار وکړ او د ترابي صاحب له لوري ښاغلي اریک مارکولي ته هغه ډالۍ هم وسپارل شوه چې د نوموړي لپاره په پام کې نیول شوې وه.
نېټه:۱۴۴۷/۹/۲۲ هـ ق
له پېښو سره د مبارزې آمادګۍ ملي اداره
