د پکتیا ولایت په مرکز کې ناچاوده توکي کشف او خنثی شول
له پېښو سره د مبارزې آمادګۍ ملي ادارې او د ایریا ماین پاکۍ موسسې ترمنځ د لاسلیک شوي هوکړه لیک له مخې، د یادې موسسې تخنیکي ټیمونو د پکتیا ولایت له پېښو سره د مبارزې آمادګۍ ریاست سره په همغږۍ، د دې ولایت په مرکز کې د ناچاودو توکو د راټولولو او له منځه وړلو عملیات ترسره کړل.
په دې عملیاتو کې چې د گردیز اړوند د سیدکرم او قلعه نیازیو په سیمو کې د موسسې د تخنیکي ټیمونو لخوا ترسره شول، یو فیر د راکټ مرمۍ، یو فیر د هاوان مرمۍ، ۱۶ عدد فیوزونه، دوه فیر د راکټ مرمۍ فورپلنت بوستر او یو فیر ۸۲ مليمتري د توپ مرمۍ کشف او خنثی کړل شوې.
د پکتیا ولایت له پېښو سره د مبارزې آمادګۍ ریاست ټینګار کوي چې دا ډول عملیات به د خلکو د ژوند د خوندیتوب او د ناچاودو توکو له امله د رامنځته کېدونکو ګواښونو د کمولو په موخه دوام ولري، او د شکمنو توکو د راپور ورکولو په برخه کې د خلکو له همکارۍ مننه کوي.
نیټه: ۱۴۴۷/۰۸/۲۸ هـ ق
له پېښو سره د مبارزې آمادګۍ ملي اداره
