له پېښو سره د مبارزې آمادګۍ ملي ادارې د چارو پر وخت ترسره کولو او د اسانتیا په موخه د مرکزي او ولایتي ریاستونو لپاره ۴۴ عرادې موټرسایکلونه وپېرل
له پېښو سره د مبارزې آمادګۍ ملي ادارې د لوی رئیس، محترم الحاج ملا نورالدین ترابي، د لارښوونې پر بنسټ، دې ادارې په ښه توګه د کاري چارو پرمخ وړلو او د دندو د پر وخت ترسره کولو په موخه، د مرکزي او ولایتي ریاستونو له لوري د کارولو لپاره ۴۴ عرادې موټرسایکلونه وپېرل.
د دې موټرسایکلونو د پېرلو موخه، د ښارونو ساحو ته د کارکوونکو د لاسرسي چټکتیا زیاتول، په ښاري ترافیکي ګڼهګوڼه کې د وخت له ضایع کېدو څخه مخنیوی، او د هر کوچني کار لپاره د موټرو له بېځایه وتلو څخه ډډه کول دی؛ دا چاره نه یوازې د ښاري نظم په ټینګښت کې مرسته کوي، بلکې د سونتوکو لګښتونه، د وسایطو د ترمیم او ساتنې لګښتونه هم راکموي او د بیتالمال له امکاناتو څخه اغېزمنه ګټه اخیستنه تضمینوي.
همدارنګه، د موټرو په پرتله د موټرسایکلونو کارول په ګڼهګوڼه لرونکو ښاري لارو او ستونزمنو تېرېدونکو سیمو کې د چټک تګراتګ زمینه هم برابروي او چارو ته په بېړه سره د رسېدنې امکان زیاتوي.
له پېښو سره د مبارزې آمادګۍ ملي اداره دا ګام د سرچینو د ښه مدیریت، د لګښتونو د کمولو او په مرکز او ولایتونو کې د خدمتونو د اغېزمنتیا د زیاتولو په برخه کې یو مهم او اغېزناک ګام بولي.
نېټه: ۱۴۴۷/۷/۲۴ هـ ق
له پېښو سره د مبارزې آمادګۍ ملي اداره
