د پکتیا ولایت په وزه زدران ولسوالۍ کې د یو استنادي دېوال د جوړولو چارې بشپړې شوې
د پکتیا ولایت په وزه زدران ولسوالۍ کې د یو باب استنادي دېوال د جوړولو چارې، چې لسګونه کلي به د سېلابونو او د لارو د بندېدو له خطره وژغوري، په بریالیتوب سره بشپړې شوې.
یاد پروژه له پېښو سره د مبارزې آمادګۍ ملي ادارې او د پکتیا ولایت د مقام په ګډ مالي ملاتړ، او د پکتیا ولایت له پېښو سره د مبارزې آمادګۍ ریاست په همغږۍ، د وزه زدران ولسوالۍ په «لکهتیغه» سیمه کې پلي شوه.
تر دې وړاندې، د شواک او گردهڅېړۍ ولسوالیو سېلابونه د لکهتیغه سیمې ته بهېدل، چې له امله یې د مواصلاتي لارې بندېدې او د وزه زدران ولسوالۍ د سلګونو اوسېدونکو ژوند او مال له جدي ګواښ سره مخ کېده او د خلکو تګ راتګ یې له سختو ستونزو سره مخ کړی و. د دې استنادي دېوال په بشپړېدو سره به د سیمې اوسېدونکي د سېلابونو له خطر څخه خوندي شي.
دغه استنادي دېوال د دوه میلیونه او پنځوس زره (۲،۰۵۰،۰۰۰) افغانیو په لګښت، د ۱۶۰ مترو په اوږدوالي او د ۴٫۵ مترو په لوړوالي، د سعادات افغان ساختماني شرکت له لوري جوړ شوی دی. همدارنګه په پام کې ده، چې دا پروژه به په نیږدې راتلونکي کې په رسمي ډول ګټېاخېستنې ته وسپارل شي او ورڅخه به لسګونه کلي مستفید شي.
نېټه: ۱۴۴۷/۰۷/۱۵ هـ ق
له پېښو سره د مبارزې آمادګۍ ملي اداره
