د زابل ولایت په مرکز قلات کې د یو استنادي دیوال د جوړېدو له چارو څخه څارنه وشوه
د زابل ولایت له پېښو سره د مبارزې آمادګۍ ریاست آمر، محترم الحاج مولوي محمد یوسف محمد د زابل ولایت د مرکز قلات په باکورزو کلي کې، د یو استنادي دېوال د جوړوېدو له چارو څخه لیدنه وکړه.
یاد استنادي دیوال له پېښو سره د مبارزې آمادګۍ ملي ادارې او د کډوالۍ نړیوال سازمان IOM د همغږۍ له مخې، د یاد ولایت له پېښو سره د مبازرې آمادګۍ ریاست د یاد سازمان په مالي ملاتړ، د ۳۲۲ متره اوږوالي، ۱۶۰ سانتي متره سور او ۳۸۰ سانتي متره لوړوالی په درلودلو سره د جوړېدو په حال کې دی.
محترم محمد په پیل کې، د یادې پروژې څخه هر اړخیزه لیدنه وکړه چې پروژه د نقشې سره سم جوړیږي او بې له کوم نیمګړتیا څخه یې د کار لړۍ دوام لري.
د یادونې وړ ده، چې د دې پروژې په بشپړېدو سره به شاوخوا ۳٠ کورونه او کرنيزې ځمکې د سېلابونو له احتمالي خطرونو څخه خوندي شي.
نېټه: ۱۴۴۷/۷/۰۴ هـ ق
له پېښو سره د مبارزې آمادګۍ ملي اداره
