د ننګرهار ولایت له پېښو سره د مبارزې آمادګۍ ریاست د باران او سېلاب له امله ۳۰ زیانمنو کورنیو ته غیرخوراکي مرستې ووېشلې

د ننګرهار ولایت له پېښو سره د مبارزې آمادګۍ ریاست د کډوالۍ نړیوال سازمان (IOM) او د PUMI موسسې په مالي او تخنیکي همکارۍ، د یاد ولایت په کوزکونړ، مهمندره، سرخرود ولسواليو او جلال آباد ښار که د بارانونو او سېلابونو له امله ۳۰ زیانمنې کورنۍ له سروې او ارزونې وروسته د غیرخوراکي او اړینو توکو د مرستو لپاره مستحقې وپېژندل شوې.
په دې لړۍ کې هرې کورنۍ ته د کډوالۍ نړیوال سازمان (IOM) له لوري، هرې کورنۍ ته د کور جوړولو بسته، ۳ تختې کمپلې، یوه فامیلي بسته، ۲ پایه سولري سیستم، پلاستیکي فرش، لاسي جارو او د PUMI موسسې له لوري هرې کورنۍ ته لس لیټره ۲ بوشکې، شل لیټره ۲ بوشکې، ۵ کلچې د لاس منځلو صابون، ۱۰ عدده کلورین ټابلیټ، د ښځو لپاره ۶ ټوټې شپږ متره ټوکر او یو بکس ووېشل شول. همدارنګه، د له یادې جملې څخه ۱۵ کورنیو ته چې کورونه یې زیات ویجاړ شوي وو، د IOM له لوري یوه یوه خیمه هم ووېشل شوه.  
د مرستو ترلاسه کوونکو کورنیو د مرستو له امله له پېښو سره د مبارزې آمادګۍ ملي ادارې او همکاره سازمانونو څخه خوښي او قدرداني څرګنده کړه او د دې ډول مرستو د دوام غوښتنه یې وکړه. 

نېټه: ۱۴۴۷/۴/۲۸ هـ ق
له پېښو سره د مبارزې آمادګۍ ملي اداره