د کونړ ولایت په دیوه ګل دره کې د زلزلې له امله د ۳۸۲ شهیدانو ورثه، ټپیانو او زیانمنو ته نغدي، خوراکي او غیر خوراکي مرستې ووېشل شوې
د کونړ ولایت له پېښو سره د مبارزې آمادګۍ ریاست او د کار او ټولنیزو چارو ریاست ګډې کمېټې د احساس خیریه مؤسسې او یو خییر کس په ملاتړ، د دې ولایت د څوکۍ ولسوالۍ په دیوه ګل دره کې د وروستۍ زلزلې له امله د ۳۸۲ شهیدانو ورثه، ټپیانو او زیانمنو ته نغدي، خوراکي او غیر خوراکي مرستې ووېشلې.
په دې لړۍ کې د ټاکل شوې کمېټې د مسؤلینو په شتون کې، د احساس خیریه بنسټ له لوري ۱۹۰ کورنیو هرې یوې ته، ۵۰ کیلو اوړه، ۵ لیټره غوړي، یوه د پخلنځي بسته، یوه د ګاز ډبه او یو تخته کمپله او همدارنګه د یو خییر کس لخوا ۱۹۲ کورنیو ته نغدي پیسې په داسې توګه ووېشل شوې، چې ۳۱ کورنیو هرې یوې ته ۵،۰۰۰ افغانۍ او ۶۱ نورو کورنیو هرې یوې ته ۴،۰۰۰ افغانۍ په پام کې نیول شوې وې.
په عین حال کې، د مرستو ترلاسه کوونکو له اړوندو مسؤلینو څخه خوښي څرګنده کړه او اسلامي امارت او مرسته کوونکو ته یې د خیر دعا وکړه.
نېټه: ۱۴۴۷/۷/۲۲ هـ ق
له پېښو سره د مبارزې آمادګۍ ملي اداره
