د سمنگان ولایت په مرکز کې د یو استنادي دیوال د ترمیم کار پیل شو
له پېښو سره د مبارزې آمادګۍ ملي ادارې د سرپرست، محترم الحاج ملا نورالدین ترابي د لارښوونې پر بنسټ، د سمنګان ولایت له پېښو سره د مبارزې آمادګۍ ریاست، د دې ولایت د مرکز په آسیای عرب سیمه کې د یو کیبلي پل استنادي دیوال، چې د سېلابونو له امله دوه برخې یې زیانمنې شوې وې، د ترمیم کارونه یې د یو شمېر سیمه ییزو مسؤلینو په شتون کې رسماً پیل کړل.
یاد دیوال چې یوه برخه یې ۵ متره اوږدوالی، ۴ متره پلنوالی او ۱۲ متره لوړوالی لري او بله برخه یې ۵ متره اوږدوالی، ۳ متره پلنوالی او ۱۲ متره لوړوالی لري، ټولټال د اته سوه نه شپېته زره او اته سوه شپږ نوي (۸۶۹,۸۹۶) افغانیو په لګښت له پېښو سره د مبارزې آمادګۍ ملي ادارې له لوري ترمیم کېږي.
له پېښو سره د مبارزې آمادګۍ رئیس، محترم الحاج مولوي احسان الله احسان وويل، چې د دې استنادي دیوال په ترمیم سره به د سېلابونو پر وړاندې د خلکو کورونه او کرنیزې ځمکې خوندي پاتې شي.
نېټه: ۱۴۴۷/۱/۱۸ هـ ق
له پېښو سره د مبارزې آمادګۍ ملي اداره
