د میدان وردګ ولایت په نرخ ولسوالۍ کې د یو پُل د جوړولو کار رسمآ پیل شو
د عالیقدر امیرالمؤمنین حفظهالله د لارښوونې پر بنسټ، د طبیعي پېښو د خطرونو د کمولو په موخه، د هېواد په هر ولایت کې د وقایوي پروژو د پلي کولو لپاره یو میلیون افغانۍ ځانګړې شوې دي. په همدې تړاو، له پېښو سره د مبارزې آمادګۍملي اداره له سروې او د بېړني وضعیت تر تشخیص وروسته، دا پروژې تمویل او د هېواد په کچه پلي کوي.
په همدې لړ کې، د میدان وردګ ولایت له پېښو سره د مبارزې آمادګۍ ریاست له لوري، د یو شمېر سیمه ییزو مسؤلینو په شتون کې د یاد ولایت نرخ ولسوالۍ په ده خرقې سیمه کې د ۲,۵۰۰,۰۰۰ (دوه میلیونه او پنځه سوه زره افغانیو) په ارزښت د یو پُل د جوړولو کار عملاً پيل شو.
د یادونې وړ ده، چې د میدان وردګ ولایت نرخ ولسوالۍ په ده خرقې سیمه کې دا پُل چې تقریباً ۴,۰۰۰ کورنۍ پرې تګ راتګ کوي د پُل د خرابېدو له امله ځايي اوسېدونکي له زیاتو ستونزو سره مخ وو، چې د خلکو د غوښتنې سره سم د میدان وردګ ولایت له پېښو سره د مبارزې آمادګۍ ریاست تر تخنیکي سروې وروسته د یاد پُل جوړولو د پروژې کار پیل کړ.
ورته مهال، د سیمې خلکو د اسلامي امارت د مشرتابه او له پېښو سره د مبارزې آمادګۍ ملي ادارې له لوري د خلکو اړتیاوو او ستونزو ته له پاملرنې او همکارۍ څخه مننه او قدرداني وکړه او دا پروژه یې د سیمې لپاره خورا ګټوره وبلله.
نېټه: ۱۸/۱۲/۱۴۴۶ هـ ق
له پېښو سره د مبارزې آمادګۍ ملي اداره
