په کندهار ولایت کې ۱۴۰ کړۍ ماینونه او چاودېدونکو توکي کشف او خنثی کړل شول
دکندهار ولايت له پېښو سره د مبارزې آمادګۍ رياست د MCPA ماين پاکۍ موسسې په همکارۍ، تيره ورځ د دې ولايت په پنجوايي ولسوالۍ کې د ١٤٠ کړۍ ماينونه او له جنګونو څخه د چاودېدونکو توکو پاتې شوني په بریالۍ توګه کشف او خنثی کړل.
له دې له جملې څخه یې ۳۳ د بشکې ماینونه وو، چې د خورا خطرناکو ماینونو له ډولونو څخه شمېرل کېږي.
د دې تخنیکي عملیاتو ترڅنګ د ماینونو او چاودېدونکو توکو د خطرونو په اړه د سیمې اوسېدونکو ته د عامه پوهاوي پروګرامونه هم په لاره اچول شوي وو. د دې اقداماتو موخه د ژوند د ګواښونو کمول او د ماینونو د احتمالي خطرونو په اړه د ځایي خلکو د پوهاوي لوړول دي.
له پېښو سره د مبارزې آمادګۍ ریاست ټینګار کوي چې د پاکولو او پوهاوي لړۍ به په نورو اغېزمنو سیمو کې هم دوام ولري.
نېټه: ١٤٤٦/١١/١٥ هـ ق
له پېښو سره د مبارزې آمادګۍ ملي اداره
