په کابل کې د سوداګریزو مرکزونو په اړه د اور لګېدنې د مخنیوي د دایمي تخنیکي کمېټې غونډه تر سره شوه
د اور لګېدنې د مخنیوي د دایمي تخنیکي کمېټې غونډه د کابل ښار په مارکیټونو او سوداګریزو مرکزونو کې د اور لګېدنې د خطرونو د کمولو او خوندیتوب په موخه، له پېښو سره د مبارزې آمادګۍ ملي ادارې د اور لګېدنې چارو د کارپوه قاري اجمل عمري په مشرۍ ترسره شوه. په دې ناسته کې د کابل ښاروالۍ، د افغان ملي بیمې شرکت، د اطفايې د عمومي ریاست او نورو اړوندو بنسټونو استازو شتون درلود.
په دې غونډه کې، قاري اجمل عمري د دې کمېټې د کړنو د مثبتې ارزونې په ترڅ کې وويل، چې له پېښو سره د مبارزې آمادګۍ ملي ادارې، ښاروالۍ او د اطفایې ریاست ځانګړي استازي به د چک ليستونو د وېش لپاره وګومارل شي. هغه زیاته کړه چې د پمپ سټیشنونو د معیاري کولو بریالیو تجربو یې د مارکیټونو د معیاري کولو د مثبتو پایلو هیلې زیاتې کړې دي.
په دې غونډه کې همدارنګه، په دې هم ټینګار وشو چې د چک لیست یوه کاپي دې د هر سوداګریز مرکز مسؤل ته وسپارل شي او د خوندي تدابیرو د عملي کولو په برخه کې دې لازمې زده کړې ورکړل شي. دا لړۍ باید د اړوندو سیمه ییزو مسؤلینو او د مارکیټونو د مدیرانو په شتون کې ترسره شي.
د غونډې په پای کې، په کابل کې د سوداګریزو مرکزونو د خوندي کولو بهیر په اغېزمنه توګه د پیل په موخه د چک لیستونو د تطبیق او وېش لپاره د شنبې او یکشنبې ورځې ځانګړې شوې.
نېټه: ۱۴۶۶/۱۱/۰۳ ه. ق
له پېښو سره د مبارزې آمادګۍ ملي اداره
