د کونړ ولایت په ډانګام ولسوالۍ کې د دې ادارې لخوا د استنادي دېوال د جوړېدو کار له بشپړېدو وروسته ګټې اخېستنې ته وسپارل شو
د کونړ ولایت له پېښو سره د مبارزې آمادګۍ ریاست، د ډانګام ولسوالۍ په دوبندو سیمه کې د ۵۰ متره په اوږدوالي او د ۵ متره په لوړوالي استنادي دېوال رسماً ګټې اخیستنې ته وسپاره.
دا پروژه د ۱ میلیون افغانیو په لګښت، د عالیقدر امیرالمؤمنین حفظ الله د حکم پر بنسټ، له پېښو سره د مبارزې آمادګۍ ملي ادارې له لوري تمویل شوې او د ناصر سلیم ساختماني شرکت لخوا په ۴۳ ورځو کې بشپړه شوه.
د دې پروژې د پرانستې مراسم، د کونړ ولایت د مقام د دفتر رئیس، له پېښو سره د مبارزې آمادګۍ رئیس، د ډانګام ولسوال، او د خطرونو د کمولو او مخنیوي مدیر په ګډون ترسره شول، په دې مراسمو کې چارواکو ټینګار وکړ چې اسلامي امارت د خلکو د ستونزو د حل او اړینو خدماتو وړاندې کولو ته ژمن دی.
د سیمې اوسېدونکو د دې پروژې له بشپړېدو خوښي وښوده او ویې ویل، چې د استنادي دېوال په جوړېدو سره د سیان درې عمومي سړک، یو کانکریټي پل، یوه زرنده، یوه امنیتي پوسته او شاوخوا ۲۰ جریبه کرنیزه ځمکه د سېلابونو له خطره خوندي پاتې شوه. هغوی د دې ډول نورو پروژو د پلي کېدو غوښتنه هم وکړه.
نېټه: ۱۴۴۶/۱۰/۳۰
له پېښو سره د مبارزې آمادګۍ ملي اداره
