له پېښو سره د مبارزې آمادګۍ ملي ادارې مرستیال د خوست، پکتیا او لوګر ولایتونو له پېښو سره د مبارزې آمادګۍ ریاستونو له فعالیتونو څخه لیدنه وکړه
له پېښو سره د مبارزې آمادګۍ ملي ادارې د سرپرست د حکم پر بنسټ، د یادې ادارې د پېښو چارو د همغږۍ مرستیال، محترم الحاج ملا عبدالولي څارنوال(حاجي وارث)، د یو تخنیکي پلاوي په ملتیا د پکتیا، خوست او لوګر ولایتونو له پېښو سره د مبارزې آمادګۍ ریاستونو د فعالیتونو د څارنې او ارزونې په موخه یادو ولایتونو ته سفر وکړ.
نوموړی، د دی سفر په پیل کې لومړی خوست ولایت ته ورسېد او د یاد ولایت له مرستیال والي سره یې وکتل او د خپل سفر د موخې د بیانولو ترڅنګ یې له پېښو سره د مبارزې آمادګۍ ولایتي کمېټې ترمنځ د همغږۍ پر پیاوړتیا ټینګار وکړ.
د پېښو چارو د همغږۍ مرستیال، د خوست ولایت له پېښو سره د مبارزې آمادګۍ ریاست څخه هم لیدنه وکړه، او د یاد ریاست لپاره د اداري ودانۍ ساختماني کارونه او د یاد ریاست ورځني کارونه یی هم وڅېړل، نوموړي، د اداري ودانۍ د ساختماني چارو پر وخت او ښه کیفیت سره پر بشپړېدو ټینګار وکړ او یاد ولایت له مقام څخه یې د اداري ودانۍ پر ساختماني چارو د څارنې غوښتنه وکړه. همداراز، نوموړي په ساختماني چارو کې شته د نیمګړتیاوو د ژر تر ژره د حل په اړه مسؤلینو ته لازمې لارښوونې وکړې.
له هغه وروسته، محترم ملا عبدالولي څارنوال، پکتیا ولایت ته سفر وکړ او د یاد ریاست له مسؤلینو سره یې په کتنه کې د هغوی کاري راپورونه، ستونزې او وړاندیزونه واورېدل. د پکتیا ولایت له پېښو سره د مبارزې آمادګۍ ریاست مسؤلینو د محترم څارنوال صاحب له راتګ څخه مننه وکړه او په یاد ولایت کې د پېښو رامنځته کېدو پر مهال د خلکو اړتیاوو ته د رسېدنې په موخه خپلې اړتیاوې او وړاندیزونه شریک کړل. ورته مهال د پېښو چارو د همغږۍ مرستیال د یاد ریاست مسؤلینو ته د هغوی د اړتیاوو پوره کولو او له پېښو سره د مبارزې آمادګۍ ملي ادارې له سرپرست سره د هغوی د وړاندیزونو شریکولو په اړه ډاډ ورکړ.
په پای کې له پېښو سره د مبارزې آمادګۍ ملي ادارې د پېښو چارو د همغږۍ مرستیال، لوګر ولایت ته ولاړ او د یاد ولایت له پېښو سره د مبارزې آمادګۍ ریاست څخه یې لیدنه وکړه او د ریاست د فعالیتونو په اړه یې د مفصل راپور له اورېدو وروسته د هغوی فعالیتونه وستایل او په یاد ولایت کې یې د پېښو له امله زیانمنو ته د رسېدنې لپاره د کارونو پر چټکتیا ټینګار وکړ. نوموړي ډاډ څرګند کړ چې د افغانستان اسلامي امارت په ځانګړې توګه له پېښو سره د مبارزې آمادګۍ ملي ادارې مشرتابه د هېواد په کچه د طبیعي او غیر طبیعي پېښو په برخه کې د خلکو ستونزو ته د رسېدنې په برخه کې ځانګړې پاملرنه کوي او د هېوادوالو د اړتیاوو پوره کولو او د هغوی لپاره د لا زیاتو آسانتیاوو په برابرولو کې به د هر ډول امکاناتو څخه ګټه واخلي او له هغوی څخه به هېڅ ډول مرستې و نه سپموي.
نېټه:۱۴۴۶/۱۰/۲۲ هــ ق
له پېښو سره مبارزې آمادګۍ ملي اداره
