له پېښو سره د مبارزې آمادګۍ ملي ادارې سرپرست د کندهار ولایت له پېښو سره د مبارزې آمادګۍ ریاست د اداري ودانۍ د جوړولو کار پرانست
نن ورځ شنبه، له پېښو سره د مبارزې آمادګۍ ملي ادارې سرپرست الحاج ملا نورالدین ترابي کندهار ولایت ته د سفر پر مهال د عینو مینې په ښارګوټي کې د یاد ولایت له پېښو سره د مبارزې آمادګۍ ریاست د اداري ودانۍ د جوړولو کار پرانست.
د پرانستنې په دې مراسمو کې د کندهار ولایت مرستیال والي ملا محمد صادق انقلابي، دکندهار ولایت له پېښو سره د مبارزې آمادګۍ رئیس الحاج قاري عبدالسلام عمري، د اړوندو ادارو مسؤلینو، د یادې ادارې تخنیکي کارکوونکو او یو شمېر مشرانو او د سیمې خلکو شتون درلود.
ترابي صاحب جوړې شوې غونډې ته وویل چې نن موږ د کندهار ولایت له پېښو سره د مبارزې آمادګۍ ریاست د اداري ودانۍ د جوړولو کار د ۱۳ میلیونه افغانیو په ارزښت پیلوو او دا پروژه به د ۶ میاشتو په موده کې بشپړه شي. او دا به درې پوړیزه اساسي ودانۍ وي. چې اول پوړ زیرخانه به یې د خوراکي او غیر خوراکي توکو د ګدام لپاره وي دویم پوړ به یې ۶ اطاقه دفترونه وي او درېیم پوړ به یی هم ۶ خونې ولري چې ټولټال به د ۳۶۴ متر مربع په ځمکه کې جوړه شي.
همداراز ترابي صاحب زیاته کړه چې له دې وړاندې مو د میدان وردګ، کاپیسا، خوست او سمنګان ولایتونو له پېښو سره د مبارزې آمادګۍ ریاستونو د اداري ودانۍ د جوړولو کار پیل کړې چې په ټاکل شوي وخت به یې کارونه بشپړ شي.
ورته مهال د کندهار ولایت مرستیال والي ملا محمد صادق انقلابي، له پېښو سره د مبارزې آمادګۍ ملي ادارې د سرپرست هڅې وستایلې او ویې وېل،چې د دې پروژې پلي کول د ټولنې د پرمختګ لپاره یو مهم ګام دی.
همداراز، له پېښو سره د مبارزې آمادګۍ رئیس الحاج قاري عبدالسلام عمري ژمنه وکړه چې د ودانۍ د جوړولو پر بهیر به دوامداره څارنه کوی او د کار کیفیت ته به ځانګړې پاملرنه کوی.
نېټه:۱۴۴۶/۱۰/۰۷
له پېښو سره د مبارزې آمادګۍ ملي اداره
