په لغمان ولایت کې له پېښو سره د مبارزې کمېټو ته د بېړنیو حالاتو پر مهال د چمتووالي تجهیزات وسپارل شول
د کډوالۍ نړیوال سازمان (IOM) سره له پېښو سره د مبارزې آمادګۍ ملي ادارې د سرپرست د همغږۍ پر بنسټ، د لغمان ولایت الینگار ولسوالۍ په سنګر هارونخېل کلي، د الیشنګ ولسوالۍ په سالاب منځ او برهکنده کلیو او همداراز د مرکز مهترلام اړوند په عمرزي دنده او قوالخېل کلیو کې په بېړنیو حالاتو کې د پېښو پر وړاندې د چمتووالي پنځه کمېټې جوړې شوي دي. یادې کمیټې د لغمان ولایت له پېښو سره د مبارزې آمادګۍ ریاست په همغږۍ او د کډوالۍ نړیوال سازمان (IOM) په مالي او تخنیکي ملاتړ تأسیس شوي دي.
په مجموعي ډول، ۳۰ سړي او ۳۰ ښځې د دې کمیټو د غړو په توګه روزل شوي دي. هرې کمیټې ته یو ۱۰ فوټه کانټینر او ۶۹ قلمه اړین تجهیزات ورکړل شوي، چې د سیمې د مشرانو لخوا ترلاسه شول.
د دې مرستو موخه دا ده چې د طبیعي پېښو لکه سېلابونو، زلزلو او نورو پېښو پر مهال د ژغورنې امکانات برابر شي. دا چمتووالی ډېر ارزښت لري، ځکه چې په بیړنیو حالاتو کې د دغو تجهیزاتو له لارې ټیمونه کولای شي زیانمنو کسانو ته حیاتي مرستې ورسوي.
د یادونې وړ ده چې د ژغورنې وسایل د خلکو د ژوند ژغورنې لپاره اساسي رول لري او په بېړنیو شرایطو کې د زیانمنو کسانو د لومړنیو اړتیاوو پوره کولو ته اسانتیاوې برابروي.
نېټه:۱۴۴۶/۹/۱۳
له پېښو سره مبارزې آمادګۍ ملي اداره
