له پېښو سره د مبارزې آمادګۍ ملي ادارې او د اکشناېډ موسسې ترمنځ د ۶۹۴,۴۲۸ ډالرو په ارزښت د ګډو همکاریو تفاهم نامه لاسلیک شوه
نن ورځ د سهشنبه، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، د اکشناید موسسې له رئیس، سری کانتا میسرا سره په خپل کاري دفتر کې وکتل او د ګډو همکاریو تفاهم نامه یې ورسره لاسلیک کړه.
په دې غونډه کې، ترابي صاحب د ښه راغلاست ترڅنګ ووېل چې موږ هڅه کوو ترڅو خلکو ته په ښه توګه خدمتونه وړاندې کړو او هغوی ته مرستې ورسوو، هغه وویل چې سربېره پر دې چې د مرستندویه موسسو ملاتړ کوي، هغوی هڅوي چې د خلکو د ستونزو د کمولو لپاره زیاته بودجه په پام کې ونیسي. همدارنګه یې ټینګار وکړ چې دا ژمنۍ مرستې دي او باید د پلي کولو په برخه کې چټکتیا رامنځته شي.
ترابي صاحب وویل چې افغانستان د خپل جغرافیايي موقعیت له امله د طبیعي پیښو پر وړاندې زیانمنونکې هېواد دی او اړتیا ده چې وقایوي پروژې پلي شي. هغه له موسسو وغوښتل چې په دې برخه کې همکاري وکړي.
وروسته، د اکشناید موسسې رئیس سری کانتا میسرا، له پېښو سره د مبارزې آمادګۍ ملي ادارې سرپرست څخه د همکارۍ لپاره مننه وکړه او د پروژې په اړه د وضاحت ورکولو پر مهال یې ووېل چې دا پروژه د UN_OCHA د دفتر په مالي ملاتړ د اکشنایډ موسسې له لارې د ۶۹۴,۴۲۸ ډالرو په ارزښټ به په کابل او غور ولایتونو کې ۱,۷۴۰ کورنیو ته د نغدي او ژمنۍ مرستو په وېش سره پلي کېږي.
د یادونې وړ ده، چې د دې تفاهم نامې پر بنسټ، د ۶۹۴,۴۲۸ ډالرو په ارزښت به د کابل ولایت په پغمان ولسوالۍ کې ۱۰۲۰ کورنیو ته او د غور ولایت په لعل او سرجنګل ولسوالیو کې ۷۲۰ کورنیو هرې یوې ته ۲۷۴ ډالر د سون توکو او ژمنۍ جامو پېرلو لپاره ورکړل شي، او همدارنګه هرې کورنۍ ته به د ۵۷ ډالرو په ارزښت ۵ تختې (یوه دوه کسیزه او ۴ یو کسیزه) کمپلې ووېشل شي.
نېټه:۱۴۴۶/۹/۴
له پېښو سره د مبارزې آمادګۍ ملي اداره
