د کابل ولایت له پېښو سره د مبارزې آمادګۍ ریاست ٢٠٣ زیانمنو کورنیو ته نغدي مرستې ووېشلې
له پېښو سره د مبارزې آمادګۍ ملي ادارې او د ژغورنې نړیوالې کمېټې (IRC) ترمنځ د لاسلیک شوي هوکړه لیک له مخې، د کابل ولایت له پېښو سره د مبارزې آمادګۍ ریاست د یادې کمېټې په مالي ملاتړ، د کابل ښار د اوومې او اوولسمې ناحیې اړوند زیانمنو کورنیو ته د سون توکو او د ژمنیو جامو د پېرلو په موخه نغدي مرستې ووېشلې.
په دې لړۍ کې، له سروې وروسته د مسؤلینو په شتون کې هرې کورنۍ ته د څلورم پړاو ٢,٨٠٠ افغانۍ ووېشل شوې چې ټولټال ٥٦٨,٤٠٠ ( ٥٦٨ زره او ٤٠٠ ) افغانۍ د یاد شمېر کورنیو لپاره ځانګړې شوې وې.
د یادونې وړ ده، چې یاد شمېر هرې کورنۍ ته به په راتلونکو اته پړاوونو کې ټولټال د ٣٢٠ ډالرو معادل افغانۍ ووېشل شي.
نېټه: ١٤٤٦/٧/۲۵
له پېښو سره د مبارزې آمادګۍ ملي اداره
