د بلخ ولایت په شولګره ولسوالۍکې د سېلابونو په راوتو سره د ۵۰۰ کسانو لپاره ګرمه ډوډۍ چمتو شوې  

د بلخ ولایت له پېښو سره د مبارزې آمادګۍ ریاست د راپور له مخې, تېره شپه، په شولګرې ولسوالۍ کې د بارانونو له امله رامنځته شویو سېلابونو څخه کورونو، کرنیزو ځمکو، زیربناوو او څارویو ته نسبتاً پراخه زیانونه اوښتي دي.
د لومړني راپور له مخې، د دې پېښې له امله له ۲۰۰ څخه زیات کورونه زیانمن شوي، له ۴۰۰ جریبه زیاته کرنیزه ځمکه، ۵ کیلومتره سړک او یوه جومات ویجاړ شوي دي او یو شمېر څاروي هم تلف شوي دي.
د ارزونې ټیمونه د بلخ ولایت له پېښو سره د مبارزې آمادګۍ رئیس   د مولوي بشیر احمد بشراني په مشرۍ او د IOM، WFP او ACTED موسسو په همکارۍ  زیانمنو شوو سیمو ته د وضعیت د ارزونې او زیانمنو کسانو د پېژندلو لپاره ته تللي دي.
د دې ریاست په وینا، د دې پېښې له امله زیانمنو شویو ۵۰۰ کسانو لپاره ګرمه ډوډۍ چمتو شوي ده او د شپې د خوړو وېش پروګرام هم ورته په جريان کې دی. د زیانونو د ارزونې او پلټنې عملیات لا هم دوام لري.

نیټه: ۱۴۴۶/۵/۲۱
له پیښو سره د مبارزې آمادګۍ ملي اداره