د پروان ولایت اړوند سیمو کې د ۶ وقایوي پروژو د جوړولو کار پیل شو
د پروان ولایت په سرخپارسا، سیاګرد، شیخعلي ولسوالیو او د دې ولایت په نورو اړوندو سیمو کې د کډوالۍ نړیوال سازمان IOM په همکارۍ د ۱۴,۴۰۰,۰۰۰ (۱۴ میلیونه او ۴۰۰ زره) افغانیو په مجموعي ارزښت د استنادي دیوال، سربند او پلچک جوړولو د ۶ وقایوي پروژو کار پيل شو.
د پروان ولایت له پېښو سره د مبارزې آمادګۍ رئیس د پروژو د کار په پرانستې غونډه کې، چې پکې سیمهییز چارواکو او د سیمې خلکو هم ګډون کړی و، وویل: دغه پروژې له پېښو سره د مبارزې آمادګۍ ملي ادارې او د کډوالۍ نړیوال سازمان ترمنځ د لاسلیک شوي هوکړه لیک له مخې او د یاد ریاست تر څارنې لاندې جوړیږي، او کیفیت ته به یې جدي پام وشي. هغه زیاته کړه، چې د دې ډول پروژو په پلي کولو سره به د سېلابونو له امله د ځاني او مالي زیانونو کچه کمه شي، او له موسسو یې وغوښتل چې په وقایوي پروژو کې همکاري وکړي.
د یادونې وړ ده چې، د شینواري ولسوالۍ د کجکان کلي ۷۲ متره د کانال سربند او استنادي دیوال جوړول، په سیاګرد ولسوالۍ کې د استنادي دیوال او سربند جوړول، په دهنو کلي کې د ۴۵۰ متره استنادي دیوال جوړول، په سرخپارسا ولسوالۍ کې د تیرکوه کانال د سربند ترمیم، په شیخعلي ولسوالۍ کې د پلچک جوړول او په ګنبد کلي کې د کانال سربند جوړول پیل شوي دي، چې د دې کار په بشپړېدو سره به یادې سیمې او یو شمېر نورې سیمې د سېلابونو له خطر څخه خوندي پاتې شي.
نېټه: ۱۴۴۶/۴/۳۰
له پېښو سره د مبارزې آمادګۍ ملي اداره
