له پېښو سره د مبارزې آمادګۍ ملي ادارې سرپرست د بشري حقونو، آزادۍ او بشرپاله مرستو موسسې (IHH) د مرستیال سره وکتل
له پېښو سره د مبارزې آمادګۍ ملي ادارې سرپرست محترم الحاج ملا نورالدین ترابي، نن ورځ چهار شنبه په خپل کاري دفتر کې د IHH موسسې د مرستیال محترم شهاب الدین ثاقب او د یادې موسسې د دفتر مدیر محترم انجنیر سردار ولي شهباز سره د نړیوالو اړیکو رئیس محترم الحاج مولوي حافظ عبدالرحمن رحماني په شتون کې وکتل او خبرې یې وکړې.
محترم ترابي صاحب وویل چې زما د کار پالیسي دا ده چې موسسو ته اسانتیاوې برابرې کړم او د هغوی کارونه پر وخت سرته ورسوم، او زه له دوی څخه هم تمه لرم چې خپل کارونه په چټکتیا او روڼتیا ترسره کړي.
ورپسې د بشري حقونو او آزادۍ او بشرپاله مرستو موسسې مرستیال وویل چې، د دغه هوکړه لیک په لاسلیک کولو سره به موږ د بغلان ولایت د برکی ولسوالۍ پر ۴۰۰ سېلاب ځپلو کورنیو باندې د ۲۸۰۰۰ امریکایي ډالرو په ارزښت خوراکي مرستې ووېشو.
نوموړي زیاته کړه چې د هرې کورنۍ لپاره ۵۰ کیلو اوړه، ۱۰ کیلو وریجې، ۱۰ لیټره غوړي، ۷ کیلو لوبیا، یو کیلو چای او یو کیلو بوره شامل دي، چې له پېښو سره د مبارزې آمادګۍ ملي ادارې په همغږۍ او همکارۍ به د برکی ولسوالۍ ۴۰۰ سېلاب ځپلو کورنیو ته ووېشل شي.
نېټه: ۷/۴/۱۴۴۶
له پېښو سره د مبارزې آمادګۍ ملي اداره
