له پېښو سره د مبارزې آمادګۍ ملي ادارې سرپرست په افغانستان کې میشت د چین ولسي جمهوریت سفیر او مل پلاوي سره وکتل
نن ماسپښین له پېښو سره د مبارزې آمادګۍ ملي ادارې سپرست محترم الحاج ملا نورالدین ترابي په خپل کاري دفتر کې د چین له سفیر محترم ژاوشینګ سره ولیدل او د زیانمنو شویو لپاره د بشري مرستو په اړه یې خبرې وکړې.
محترم الحاج ملا نورالدین ترابي د چین ولسي جمهوریت د مرستو څخه مننه وکړه او زیاته یې کړه چې افغانستان او چین ملګري هېوادونه دي او چین د هغو لومړنیو هېوادونو څخه دی چې د سوداګریزو برخو ترڅنګ یې له اسلامي امارت سره بشري مرستې هم کړې دي.
محترم ترابي زیاته کړه چې زموږ فعالیتونه تر ډېره مظلومې طبقې او زیانمنو ته ځانګړي شوي دي او د چین ولسي جمهوریت څخه یې د لا زیاتو بشري مرستو غوښتنه وکړه.
له پېښو سره د مبارزې آمادګۍ ملي ادارې سپرست د چین هیواد د اقتصادي او سوداګریزو همکاریو یادونه وکړه او د تخنیکي، ټرانسپورټي او نورو اړینو برخو کې یې د همکاریو غوښتنه وکړه.
وروسته محترم ژاوشینګ، د چین سفیر، په پکتيکا، هرات او افغانستان کې د نورو پېښو زیانمنو شویو ته د مرستو یادونه وکړه او په بشري مرستو کې یې د خپل هېواد ژمنتیا بیان کړه.
ښاغلي ژاوشینګ زیاته کړه چې چین په اقتصادي، سوداګریزو او بشري مرستو کې همکاریو ته ژمن دی.
په پای کې دواړو خواوو په ټولو برخو کې، په ځانګړې توګه د پېښو مدیریت په برخه کې د لا زیاتو همکاریو او همغږۍ په اړه هوکړه وکړه.
نیټه: ۰۶/ ۰۴/ ۱۴۴۶
له پېښو سره د مبارزې آمادګۍ ملي اداره
