۲۶۵ زیانمنو کورنیو ته په پکتیا ولایت کې خوراکي او غیرخوراکي مرستې ووېشل شوې
ګردېز- د کب ۱۶مه-۱۴۰۱
پېښو ته د رسېدو په چارو کې د دولت وزارت مقام د حکم پر بنسټ، مولوي محمد مبین مفتون عمر د داخلي پلټنې آمر، د اطلاعاتو او عامه اړیکو آمر او د بېړنیو حالاتو ریاست د اړیکو مدیر، د هوا سړېدو له امله ۲۶۵ زیانمنو کورنیو لپاره د خوراکي او غیرخوراکي مرستو د وېش لړۍ څارنې په موخه، پکتیا ولایت ته سفر وکړ.
د دغو مرستو د وېش په لړۍ کې، شیخ مولوي انعام الله صلاح الدین د پکتیا ولایت مقام مرستیال ووېل: یادې مرستې له سروې وروسته په شفاف ډول مستحقو ته وېشل کېږي او دغه لړۍ د یاد ولایت په ولسوالیو کې هم په شفاف ډول دوام لري.
ورپسې مولوي نثار احمد نجات، د پکتیا ولایت پېښو سره د مبارزې رییس ووېل: نن ورځ ۲۶۵ کورنیو ته چې د هوا سړېدو له امله زیانمنې شوي وې، خوراکي او غیرخوراکي مرستې چې، ۵۰ کیلو اوړه، ۲ کیلو چاۍ، صابون، د جامو یوه کڅوړه او ۴ کیلو مایع ګاز په کې شامل دي، یاد شمېر کورنيو ته یې د وېش لړۍ دوام لري.
ښاغلي نجات زیاته کړه چې د افغانستان اسلامي امارت له بریا وروسته، له ۱۰۰ زره څخه زیاتو د پېښو له امله زیانمنو کورنیو ته نغدي، خوراکي او غیرخوراکي مرستې وېشل شوي او دغه لړۍ دوام لري.
ورته مهال مولوی محمد مبین مفتون عمر پېښو ته د رسېدو په چارو کې د دولت وزارت د داخلي پلټنې آمر ووېل: د ژمي په فصل کې یو لړ خوراکي او غیرخوراکي مرستې د هوا سړېدو او ژمنیو پېښو له امله زیانمنو ته د رسېدنې لپاره دغه ولایت ته لېږدول شوي او پېښو ته د رسېدو په چارو کې د دولت وزارت ژمن چې په یو ډول د هېواد په کچه زیانمنو ته رسېدنه وکړي.
نوموړي زیاته کړه: مرستې باید په شفاف ډول له سروې وروسته مستحقو ته ووېشل شي.
