د پکتیکا ولایت په برمل ولسوالۍ کې ۳۸ معیاري هستوګنځي د زلزله ځپلو لپاره ګټه اخېستنې ته وسپارل شول
برمل- د مرغومي ۵مه-۱۴۰۱
په برمل ولسوالۍ کې د ۳۸ معیاري هستوګنځایونو کار چې پخوا د ترکیې iHH خیریه موسسې په همکارۍ د دغه وزارت سره په همغږۍ پیل شوې و، تېره ورځ بشپړ او ګټې اخیستنې ته وسپارل شو.
الحاج ملا عبدالرحمن زاهد، د مالي او اداري عمومي رییس د الحاج اکبرشاه جمالي د مالي او اداري رییس او محمد حشم هاشمی د ولایاتو د همغږۍ آمر په ملتیا یې د زلزله ځپلو لپاره د دایمي هستوګنځایونو رغولو د پروژې ګټې اخیستنې په پروګرام کې ګډون وکړ او هغوۍ ته یې د هستوګنځایونو کلیانې ووېشلې.
ښاغلي زاهد د دغه پروګرام په پرانیسته کې ووېل: د ا.ا.ا په ځانګړي توګه پېښو ته د رسېدو په چارو کې د دولت وزارت ژمن دې ترڅو زیانمن شویو ته د بېړنۍ رسېدنې وروسته د هغوۍ لپاره دایمي معیاري هستوګنځي جوړ کړي چې نن ورځ موږ ۳۸ هستوګنځي چې د iHH دفتر لخوا بشپړ شوي، پرانیستل.
د مالي او اداري عمومي رییس د ترکیې خیریه موسسې او نورو موسسو څخه په ستاینې سره ووېل: دا یوه اړتیا ده چې ټولې هغې موسسې چې د پېښو مدیریت په برخه کې فعالیتونه ترسره کوي خپلې کړنې د پېښو وزارت سره په همغږۍ ترسره کړي.
نوموړي ووېل چې ا.ا.ا ژمن دې ترڅو د هېواد ټولو خلکو ته په یو ډول رسېدنه وکړي او له شته امکاناتو څخه به زیانمن شویو ته د رسېدنې لپاره ګټه واخلي.
ورپسې مجاهد کالج، د iHH موسسې رییس ووېل: په برمل ولسوالۍ کې د زلزلې احتمالي خطرونو پر وړاندې نن ورځ د ۳۸ معیاري هستوګنځایونو کار په مجموع کې د ۵۰۰ زره امریکایي ډالرو په لګښت بشپړ شوې چې په هر پوړ باندې د معیارونو په پام کې نیولو سره ۱۳ زره امریکایي ډالر مصرف شوي.
ښاغلي کالج زیاته کړه چې د ترکیې خیریه دفتر نغدي، خوراکي، غیرخوراکي او روغتیایي مرستې هم له زلزلې وروسته په برمل او ګیان ولسوالیو کې وېشلې دي.
