پېښو ته د رسېدو په چارو کې د دولت وزارت مرستیال د اوچا د پلټنې او ارزونې له مسوولې سره وکتل
کابل- د لیندۍ ۱۶مه- ۱۴۰۱
محترم مولوي شرف الدین مسلم، پېښو ته د رسېدو په چارو کې د دولت وزارت مرستیال، نن سهار د اغلې هاتم، د ملګرو ملتونو د بشري مرستو د همغږي دفتر د پلټنې او ارزونې مسوولې سره وکتل او د بشري سازمانونو د فعالیتونو او کړنو په اړه یې خبرې وکړې.
په دې کتنه کې د اوچا د پلټنې او ارزونې مسوولې ووېل چې موږ غواړو ترڅو د مرستندویه بشري سازمانونو فعالیتونه چې د وروستۍ زلزله ځپلو ته د رسېدنې او ځواب وینې لپاره یې ترسره کړي، و ارزوو چې هغه څومره اغېزمن و او د ښه والي لپاره یې کړنلارې وړاندې کړو.
ورپسې پېښو ته د رسېدو په چارو کې د دولت وزارت مرستیال وویل چې د وروستۍ زلزله ځپلو لپاره د مرستو د تنظیم او رسیدنې کمېسیون لخوا منظمه همغږي رامنځته شوي او همدارنګه د هغوۍ لپاره د بېړنۍ ځواب وینې په برخه کې هم اړین ګامونه د حکومت او موسسو لخوا ترسره شوي، خو د سرپناه جوړولو په برخه کې چې اساسي موضوع ده، څرنګه چې لازمه وه د پکتیکا ولایت په برمل او ګیان ولسوالیو کې کار ندې ترسره شوې او باید په نږدې راتلونکې کې د هغوۍ اړتیاوې په پام کې ونیول شي.
