په سپېرې، ګیان، برمل او ژروکی ولسوالیو کې د ۴۲۰۷ کورونو جوړولو او ترمیم کار پیل شو
کابل- د تلې ۲۰مه-۱۴۰۱
الحاج مولوی شرف الدین مسلم، پېښو ته د رسېدو په چارو کې د دولت وزارت مرستیال او د زلزلې ځپلو لپاره د مرستو د تنظیم او رسېدنې کمېسیون سرپرست د دغه کمېسیون غړو سره په غونډه کې د زلزلې ځپلو لپاره د کورونو د جوړولو او ترمیم په چټکتیا باندې ټینګار وکړ.
د زلزلې ځپلو لپاره د مرستو د تنظیم او رسېدنې کمېسیون د کاري ګروپ غونډه نن ورځ د ښار جوړونې او ځمکې، د کډوالو او راستنېدونکو، د کرنې اوبولګولو او مالدارۍ، دکورنیو چارو وزارت د کلیو د پراختیا وزارتونو او د احصایې ادارې د مسوولینو په شتون د مولوي شرف الدین مسلم پېښو ته د رسېدو په چارو کې د دولت وزارت د مرستیال په مشرۍ ترسره شوه.
په دی غونډه کې د دغه وزارت مرستیال او د کمېسیون سرپرست ووېل: د زلزلې ځپلو لپاره د مرستو د وېش څخه وروسته په سپېرې، ګیان او برمل ولسوالیو کې له ۴۲۰۷ څخه زیاتو کورونو د جوړولو کار پیل شوی او د ژمي تر را رسېدو به یې کار بشپړ شي.
ښاغلي مسلم زیاته کړه چې د کورونو د جوړولو او ترمیم کار له ۲۰ تر ۹۰ فیصده بشپړ شوی، چې دغه لړۍ د زلزلې ځپلو سره د مرستې په موخه ده.
همدارنګه په دې غونډه کې د زیانمن شویو لپاره د نغدي، خوراکي، د ژمني جامو د مرستو او د کورونو د ګرمولو لپاره د سون توکو او د کرنیزو ځمکو د وېش پر لړۍ باندې خبرې وشوې.
د یادونې وړ ده چې پېښو ته د رسېدو په چارو کې د دولت وزارت او زلزلې ځپلو لپآره د مرستو د تنظیم او کمېسیون دی ته ژمن دی ترڅو د ژمي د فصل را رسېدو مخکې ټولو زلزلې ځپلو لپاره دایمي هستوګنځي جوړ شي.
