300 بېوزله او بېځایه شویو کورنیو په کابل کې خوراکي مرستې ترلاسه کړې
کابل- د کب ۲۲مه- ۱۴۰۰
پېښو ته د رسېدو په چارو کې د دولت وزارت، نن ورځ ۳۰۰ بېوزله او بېځایه کورنیو ته په کابل کې خوراکي مرستې ووېشلې.
ملاجانان سایق د بېړنیو حالاتو د عملیاتو مرکز رییس وویل نن ورځ ۳۰۰ بېوزله او بېځایه شویو کورنیو ته د کابل ښار ۱۳مه ناحیې د دشت برچې په اتفاق ښارګوټي کې له سروې ورسته هرې کورنۍ ته ۱ بورۍ غنم ۵۰ کیلویي، ۱ بورۍ وریجې ۵۰ کیلویي او ۵ کیلو بوره ووېشل شول نوموړي همدارنګه وویل چې د کابل ولایت په نورو ولسوالیو کې دغه لړۍ روانه ده.
ښاغلي سایق وویل په تېرو شپږو میاشتو کې ۴۷ زره بېوزله او بېځایه شویو کورنیو ته د هیواد په بېلابېلوسیمو کې خوراکي او غیر خوراکي مرستې په شفافه او عادلانه توګه وېشل شوي دي.
ورته مهال د دغو مرستو ترلاسه کونکو د خوښۍ احساس وکړ او د دې لړۍ د ادامې غوښتونکي شول.
