په افغانستان کې د ماشومانو د ملاتړ د دفتر رییس او په نړۍ کې د ماشومانو د ملاتړ د بشري وضعیت عمومي رییس سره پېښو ته د رسېدو په چارو کې د دولت وزارت سرپرست لیدنه
کابل – 17 قوس 1400 / 3 جمادالاول 1443
ښاغلي غلام غوث ناصري پېښو ته د رسېدو په چارو کې د دولت وزارت مرستیال او سرپرست ورسته له غرمې له اغلې ګبریلا وایجمن په نړۍ کې د ماشومانو د ملاتړ د بشري وضعیت عمومي رییس او اغلې نورا حسنین په افغانستان کې د ماشومانو د ملاتړ د دفتر رییس سره لیدنه او خبرې وکړې.
په دې لیدنه کې پېښو ته د رسېدو په چارو کې د دولت سرپرست وزیر په افغانستان کې د ماشومانو د ملاتړ د دفتر له فعالیتونو څخه مننه او قدرداني وکړه او د لا زیاتو مرستو هیله یې څرګنده کړه.
ښاغلي ناصري وویل: له یوې خوا ۴۰ کلنې جګړې او ناامنیو او له بلې خوا طبیعي پېښو د افغانستان خلک په ځانګړې توګه ماشومان زیانمن کړي او د دې مرستو دوام ته اړتیا ده. هغه دغه راز د اړمنو او بې وزلو ماشومانو غږ تر نړیوالو رسولو غوښتونکې شو.
په ورته وخت کې، په نړۍ کې د ماشومانو لپاره د بشري وضعیت عمومي رییس، ګبریلا وایجمن، د 1919 راهیسې د دوی د کار یادونه وکړه او د اړمنو او زیان منونکو ماشومانو د ملاتړ لپاره یې د دې سازمان ژمنتیا اعلان کړه.
وروسته په افغانستان کې د ماشومانو د ملاتړ د دفتر مشرې اغلې نورا حسنین وویل: "د ماشومانو د ملاتړ دفتر له ۱۹۷۶ کال راهیسې په افغانستان کې د روغتیا، معیشت او د زیانمنونکو ماشومانو د پاملرنې په برخو کې فعال دی."
نوموړي د يادې ادارې د دندو په اړه خبرې وکړې او زياته يې کړه، چې اوس زموږ موخه د افغانستان لرې پرتو سيمو ته پاملرنه ده. هغه زیاته کړه، موږ په راتلونکي ژمي کې لس زره زیانمنې شوې کورنۍ نغدي او غیر نغدي مرستې تر پوښښ لاندې راوستې او ژمنه یې وکړه چې مرستو ته به دوام ورکوو.
په پای کې پېښو ته د رسېدو په چارو کې د دولت وزیر پر همکارۍ او همغږۍ د ټینګار ترڅنګ له دوی سره د هر ډول همکارۍ ژمنه وکړه.
