۶۰۰ زیانمن شویو کورنیو په پکتیکا کې خوراکي مرستې ترلاسه کړې

پکتیکا- د چنګاښ ۵مه-۱۴۰۱
د دغو مرستو د وېش په پروګرام کې مولوي شرف الدین مسلم پېښو ته د رسېدو په چارو کې د دولت وزارت مرستیال د ملک سلیمان خیریه بنسټ له مخکینیو مرستو څخه قدردانۍ او په مننې سره وویل: دغه مرستې به د وروستۍ زلزلې له امله زیانمن شویو ۶۰۰ کورنیو ته وېشل کېږي. نوموړي همدارنګه د یاد خیریه بنسټ څخه وغوښتل چه زیانمن شویو ته د رسېدنې په پار په لا زیاتو مرستو سره همکاري وکړي.
په دغو مرستو کې ۴۰ کیلو اوړه، ۵ کیلو وریجې، ۵ کیلو لوبیا، ۵ کیلو بوره، ۵ کیلو غوړي او ۲ کیلو خرما شامله وه چې هرې کورنۍ ته ووېشل شوې.
د یادونې وړ ده چې د ملک سلیمان خیریه بنسټ، په تېرو څو میاشتو کې د افغانستان په نورو ولایتونو کې زیانمن شویو او مستحقینو ته مرستې وېشلې دي.