په لغمان ولایت کې یو کیبلي پل تر بیارغونې وروسته ګټې اخیستنې ته وسپارل شو
د لغمان ولایت له پېښو سره د مبارزې آمادګۍ ریاست د یاد ولایت په مرکز کې د نوري کلي اړوند یو کیبلي پل چې د طبیعي پېښو له امله ویجاړ شوی وو، تر بیارغونې وروسته ګټې اخیستنې ته وسپاره.
د لغمان ولایت له پېښو سره د مبارزې آمادګۍ رییس قاري خیر محمد غازي د یاد پله د پرانیستنې په مراسمو کې وویل چې دغه پروژه له پېښو سره د مبارزې آمادګۍ ملي ادارې د داخلي بودیجې په واسطه د ۲,۱۷٦,۰۵۰ ( ٢ میلیونو، ١٧٦ زره او ٥٠ ) افغانیو په لګښت د درېو میاشتو په موده کې ورغول شوه. هغه زياته کړه، چې اوسمهال له دغه پله څخه درې زره کورنۍ د تګ راتګ لپاره ګټه اخلي، په داسې حال کې، چې له دې مخکې یادې کورنۍ له ډېرو ستونزو او محدوديتونو سره مخ وې.
د لغمان والي، شیخ شیراحمد حقاني هم په دې مراسمو کې ټینګار وکړ چې دغه پروژه د اسلامي امارت له داخلي بودیجې تمویل شوې او بیارغونې یې د خلکو د تګ راتګ لپاره اسانتیا برابره کړې دي. نوموړي په راتلونکي کې د ورته پروژو د پلي کولو په اړه هم معلومات ورکړي دي.
بل خوا د سیمې اوسیدونکو د دغه کړنې هرکلی کړی او له اسلامي امارت څخه یې غوښتي چې د دغه پله لپاره استنادي دیوالونه جوړ کړي، ترڅو په راتلونکي کې د هر ډول احتمالي تخریب مخه ونیول شي.
