په ختیځ زون کې د رضاکارانو د ټاکنې او د هغوی د ظرفیت لوړونې روزنیز پروګرام پیل شو
له پېښو سره د مبارزې آمادګۍ ملي ادارې د DACAAR موسسې په ملاتړ د هېواد په ختیځ زون کې د ټولنې په کچه د رضاکارانونو د ټاکنې او د هغوی د ظرفیت لوړولو او د کوچنیو پروژو د پلي کولو په موخه د ساحوي کارکوونکو لپاره روزنیز پروګرامونه پیل کړل.
د روزنیزو پروګرامونو دا بهیر تېره ورځ په ننګرهار ولایت کې پرانیستل شو، چې له پېښو سره د مبارزې آمادګۍ ملي ادارې د NDMIS او د رضاکارانو آمر، محترم سمیع الله حیات، د یاد ولایت له پېښو سره د مبارزې آمادګۍ ریاست د ارزونې آمر، محترم فیض محمد آغا او د یادې موسسې مسؤلینو له لوري د روزنې پروګرام وړاندې شو.
د دې روزنیزو پروګرامونو په ترڅ کې به کارکوونکو ته له پېښو سره د مبارزې آمادګۍ ملي ادارې ټول حقوقي چوکاټ، د رضاکارانو طرزالعمل، او د پېښو د مدیریت اړوند مهم مسایلو په اړه به په نظري او عملي ډول روزنه ورکړل شي. تمه ده چې ګډونوال به تر زده کړو وروسته یاد مفاهیم د ټولنې وګړو ته انتقال کړي، څو د پېښو پر وړاندې د ټولنې وړتیا لوړه شي.
همدارنګه، د دې پروسې په ترڅ کې به وړ او فعال کسان د رضاکارانو په توګه وټاکل شي، چې وروسته به له پېښو سره د مبارزې آمادګۍ ملي ادارې سره د راپور ورکولو، همغږۍ او د پېښو د مدیریت په برخه کې رضاکارانه فعالیتونه ترسره کوي.
د یادونې وړ ده چې د پروژې په پای کې به ټاکل شویو رضاکارانو ته د پېښو مدیریت اړوند اړین وسایل هم ووېشل شي، څو د بېړنیو پېښو پر مهال ګټه ترې واخلي.
نېټه:۱۴۴۷/۰۸/۰۱ هـ ق
له پېښو سره د مبارزې آمادګۍ ملي اداره
