له پېښو سره د مبارزې آمادګۍ ملي ادارې لوی رئیس د پېښو مدیریت د ستراتیژیک پلان د معرفت، شننې، تجزیې او عملي تطبیق په پروګرام کې ګډون او وینا وکړه

نن ورځ د سه شنبې په سهار، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابی، په داسې حال کې چې د مالي او اداري عمومي رئیس، محترم الحاج مولوي محمد علم عالمیار، د ادارې مرکزي رئیسانو او کارپوهانو، په آسیا کې د نړۍ ټولنیزو خدمتونو د موسسې(CWSA ) رئیس او مسوولینو او د رسنیو استازو ګډون درلود، د پېښو مدیریت د ستراتیژیک پلان (۲۰۲۵–۲۰۲۹) د معرفت، شننې، تجزیې او عملي تطبیق په پروګرام کې ګډون او وینا وکړه.

په دې پروګرام کې، محترم ترابی صاحب په مدیریت کې د اخلاص او مسلکي پوهې پر اهمیت ټینګار وکړ او څرګنده یې کړه چې یوازې ژمنتیا بسنه نه کوي، بلکې د اړوندو چارو او اسنادو سره بشپړه آشنایي درلودل هم اړینه ده. هغه ټولو مسؤلینو ته لارښوونه وکړه چې ستراتیژیک پلان په دقت سره مطالعه کړي او د هرې مادې تطبیق په خپلو اړوندو برخو کې تعقیب کړي.

همدارنګه، د ادارې لوی رئیس وویل چې دا پلان د اړوندو بنسټونو سره په مشوره چمتو شوی او په دې بهیر کې د CWSA مؤسسې همکاري هم مهمه ونډه درلوده. هغه زیاته کړه چې د ادارې د کاري لارې د روښانتیا لپاره ټول تقنیني اسناد بشپړ شوي او په ټولو کچو کې شتون لري.

په ورته وخت کې، د پلان او پالیسۍ رئیس، ملا محمد جاوید عباس، د دې سند چمتو کولو د بهیر او اهمیت په اړه خبرې وکړې او پلي کول یې مهم وباله. 

همدارنګه، دCWSA رئیس، محمد شریف هاشمي وویل چې دا سند د جاپان د خلکو د بنسټ په مالي ملاتړ، د هېواد دننه د متخصصینو او پوهنتونونو د استادانو په نظریاتو جوړ شوی او په ډېر دقیق ډول چمتو شوی دی.

دا پروګرام د محترم حبیب‌الله فرهنګ، محترم مهدی حمیدی، او استاد محمد روکي عمري لخوا د ستراتیژیک پلان د لرلید، اهمیت، عملي تطبیق، محتوا او موخو په اړه د پرزینټېشنونو په وړاندې کولو سره پای ته ورسېد.

نیټه: ۱۴۴۷/۰۸/۲۹ هـ ق

له پېښو سره د مبارزې آمادګۍ ملي اداره