له پېښو سره د مبارزې آمادګۍ ملي ادارې لوی رئیس د ننګرهار ولایت په دره نور ولسوالۍ کې د وروستۍ زلزلې له امله د ۳۵۶ زیانمنو کورنیو لپاره د نغدو او غیرخوراکي مرستو د وېش لړۍ پیل کړه

نن سهار د شنبې په ورځ، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، د ننګرهار ولایت د دره نور ولسوالۍ قلعه شاهي کلي ته د سفر پر مهال د وروستۍ زلزلې له امله د ۳۵۶ زیانمنو کورنیو لپاره د ماشومانو د ساتنې موسسې (Save the Children)، د ناروې د کډوالو شورا (NRC)، د کډالۍ نړیوال سازمان (IOM) او د ملګرو ملتونو د نقوس صندوق (UNFPA) سازمان په همکارۍ د نغدو او غیرخوراکي مرستو د وېش لړۍ پیل کړه. 
 محترم ترابي صاحب، له زلزله ځپلو کورنیو سره د کتنې پر مهال وویل، چې که څه هم دا مرستې بسنه نکوي خو د اوس لپاره دا مرستې واخلئ او موږ هڅه کوو چې ستاسو لپاره نورې مرستې هم برابرې کړو او هڅې روانې دي، چې هم د اسلامي امارت او هم د همکارو موسسو لخوا ستاسو لپاره دایمي سرپناه برابره شي.
د مرستو د وېش په دې لړۍ کې، د Save the Children لخوا هرې کورنۍ ته یو هایجن کېټ، یو تخته ترپال او د کور جوړولو وسایل او له یاد شمېر کورنیو څخه ۳۰۰ کورنیو هرې یوې ته ۲۰,۵۰۰ افغانۍ نغدې پیسې، د NRC لخوا ۵۵ کورنیو هرې یوې ته ۲۰,۵۰۰ افغانۍ نغدې پیسې، د IOM لخوا ۳۵۶ کورنیو هرې یوې ته ۸,۸۰۰ افغانۍ نغدې پیسې، له یادې جملې ۳۱۷ کورنیو هرې یوې ته یو باب خیمه او د UNFPA لخوا هرې کورنۍ ته یو تخته ترپال، یوه تخته کمپله او د ښځو لپاره د حفظ الصحې کېټونه ووېشل شول. 
ورته مهال د کډوالۍ نړیوال سازمان (IOM) او د ماشومانو د ساتنې موسسې (Save the Children) استازو د مرستو د وېش په برخه کې له پېښو سره د مبارزې آمادګۍ ملي ادارې په ځانګړي ډول د ننګرهار ولایت له پېښو سره د مبارزې آمادګۍ ریاست له همکاریو او هغږیو څخه مننه وکړه.

نېټه:۱۴۴۷/۰۳/۲۰ هـ ق
له پېښو سره د مبارزې آمادګۍ ملي اداره