له پېښو سره د مبارزې آمادګۍ ملي ادارې سرپرست په افغانستان کې د کډوالۍ نړیوال سازمان له رئیسې سره وکتل

نن ورځ پنجشنبه له غرمې وروسته، له پېښو سره د مبارزې آمادګۍ ملي ادارې سرپرست محترم الحاج ملا نورالدین ترابي، په افغانستان کې د کډوالۍ نړیوال سازمان (IOM) له رئیسې میرمن میا پارک, بشري مرستو ته د لاسرسي همغږي کوونکی عدنان بغجتي او ډاکټر محم سلیم سره په خپل کاري دفتر کې وکتل.
په دې ناسته کې ترابي صاحب میلمنو ته د ښه راغلاست ترڅنګ ووېل, سربېره پر دې چې زموږ اصلي مسؤلیت بشري چارو او پېښو ته رسېدنه ده, اوس مهال د اسلامي امارت د مشرتابه لخوا دا دنده هم را سپارل شوې چې د خپلې اصلي دندې ترڅنګ د مسؤلو او اړوندو سازمانونو سره د کډوالو او راستنېدونکو د ستونزو د حل او له هغوی سره د مرستو په برخه کې هم کارونه وکړو. هغه له IOM څخه وغوښتل چې لکه څنګه چې مخکې یې هم مرسته کړې، باید اوس هم د خپلو کاري اصولو په چوکاټ له موږ سره په دې برخه کې مرسته وکړي.
د دې ادارې سرپرست د وقایوي پروژو د پلي کېدو او د راتلونکو پروګرامونو په اړه خبرې وکړې او ویې ویل چې د رضاکارانو طرزالعمل جوړ شوی دی او اړینه ده چې له همکارو ادارو سره په همغږۍ دا رضاکاران په کلیو او ولسوالیو کې جذب شي. نوموړي په پکتیا ولایت کې د دغه سازمان د پروژې په پلي کېدو کې شته ستونزې هم واورېدې او مسؤلینو ته یې لارښوونه وکړه چې د دغو ستونزو د حل لپاره اقدام وکړي.
ورته مهال، د کډوالۍ نړیوال سازمان رئیسې میرمن میا پارک د دې ادارې سره د تېرو ژمنو د پلي کېدو د پرمختګ په اړه خبرې وکړې او ویې ویل, چې هڅه کوي ترڅو د دې همکاریو پلي کېدل لا چټک شي. هغې له ترابي صاحب څخه د دې سازمان د ستونزو د حل په برخه کې د مرستو مننه وکړه او زیاته یې کړه چې زه له خپلو نورو شریکانو سره د خبرو پر مهال تل دا اداره د یوې همکارې او بریالۍ ادارې په توګه یادوم.
د IOM مرستیال د رضاکارانو د جوړښت له طرحې ملاتړ وکړ او ویې ویل چې د دغو رضاکارانو لپاره د آسانتیاوو برابرولو په موخه به له خپلو شریکانو سره خبرې وکړي. هغه زیاته کړه چې IOM پلان لري سږ کال ۹۰ پروژې د پېښو د مدیریت او د خطرونو د کمولو په برخه کې په لغمان، بغلان، فاریاب، میدان وردګ، پکتیا، هلمند، کندهار او هرات ولایتونو کې پلي کړي.

نېټه: ۱۴۴۶/۱۰/۱۲
له پېښو سره د مبارزې آمادګۍ ملي اداره